Për vetëm katër muaj deputetët e Kosovës kanë marrë mbi 1.3 milionë euro paga dhe mëditje, kanë shpenzuar 30 mijë euro për dreka zyrtare, rreth 22 mijë euro kanë bërë shpenzime telefonike, teksa për udhëtime dhe për mëditje gjatë vizitave jashtë vendit kanë marrë rreth 30 mijë euro.
Sipas raporteve financiare të legjislativit të vendit, gjatë periudhës kohore (shtator, tetor, nëntor dhe dhjetor të 2017-s) janë shpenzuar edhe më shumë se 14 mijë euro për udhëtime zyrtare.
Gazeta “Zëri” ka analizuar edhe shpenzimet tjera të Kuvendit, në të cilat shihet se për dreka zyrtare të zgjedhurit e popullit kanë shpenzuar rreth 30 mijë euro.
Ndërkohë, Kuvendi nuk ka publikuar ende shpenzimet e deputetëve për vitin 2018, ndonëse tashmë po bëhen 5 muaj qëkur ka nisur viti.
Përkundrazi, nga Kuvendi i Kosovës kanë thënë për gazetën “Zëri” se raporti financiar për tremujorin e parë të vitit 2018 do të publikohet pasi të shqyrtohet në Komisionin për Buxhet dhe Financa.
