De Biasi shpall listën: Mendojmë vetëm për Danimarkën

29 gusht 2015 – 25 kuqezinj thirren nën armë për ndeshjet me Danimarkën më 4 dhe Portugalinë më 7 shtator. Trajneri Gianni De Biasi publikon listën e lojtarëve që do të ketë në dispozicion, ku spikat afrimi i Berat Xhimshitit në mbrojtje dhe konfirmimi i Alijit e Rrahmanit. Për herë të parë në afro katër vjet në krye të Kombëtares, italiani nuk ishte prezent në sallën e konferencave në Federatë. Por, për një trajner që përveç udhëtimeve për të vëzhguar lojtarët, një pjesë të mbikëqyrjes së ekipit e realizon edhe nëpërmjet internetit, lidhja me “Skype” nuk është e pazakontë. Drejtuesi i stolit vlerëson vështirësinë dhe rëndësinë e përballjes së parë në Kopenhagen, ndërsa për momentin nuk pranon të flasë për Portugalinë.

“Ne do të japim më të mirën edhe pse kemi pak ditë për t’u përgatitur. Me Danimarkën është një sfidë kyçe për ecurinë tonë. Nuk mund të flas edhe rreth ndeshjes me Portugalinë, dua të përqendrohem vetëm te ndeshja e radhës. Forcat dhe vëmendja jonë janë vetëm të përballja e 4 shtatorit në Kopenhagen. Kjo ndeshje nuk është vendimtare, por shumë e rëndësishme, Do të provojmë të bëjmë lojën tonë, të tentojmë të fitojmë përballë një skuadre me lojtarë të shkëlqyer. Kemi aq pikë sa Danimarka, por një ndeshje më pak. Në ndeshjen e fundit luajmë me Armeninë, ndërsa danezët kanë miqësore me Francën. Nëse do të kemi grumbulluar pikët e duhura deri në sfidën finale, do të tentojmë të marrim rezultat për t’u kualifikuar direkt.”

Kualifikueset vijnë në një moment delikat për Shqipërinë. Dëmtimi i Mavrajt në mbrojtje, apo fakti që kapiteni Cana dhe Ajeti nuk kanë gjetur skuadra të reja krijojnë mjaft probleme, por trajneri i ka idetë e qarta. “Kjo është periudhë specifike, pasi disa lojtarë nuk janë pjesë e projekteve të skuadrave të tyre. Kjo na ndikon, pasi futbollistët nuk janë në formën më të mirë. Zgjedhjet e mia taktike do të varen nga ajo që do të shoh në stërvitje. Por, mund të konfirmoj se Kukeli nuk do të luajë si qendërmbrojtës, por në pozicionin e zakonshëm përpara katër lojtarëve të repartit difensiv. Me Danimarkën luajmë në një datë aspak normale edhe sepse është fillimi i sezonit dhe lojtarët nuk janë në gjendjen maksimale fizike.”

De Biasi saktësoi se Shqipëria do të luajë në Danimarkë me një sulmues të mirëfilltë të mbështetur nga dy lojtarë krahu. Trajneri kuqezi kërkoi nga ekipi, që ndryshe nga sfida e barazuar 1-1 në Elbasan Arena në tetor të vitit të kaluar, të shfrytëzojë maksimalisht të gjithë episodet në favor. Kjo është lista e plotë e shpallur nga De Biasi për dy ndeshjet eliminatore të shtatorit ndaj Danimarkës dhe Portugalisë:

/agjencia e lajmeve "Dyrrah"/