7 shtator 2015 – Gianni De Biasi, do ta drejtojë Kombëtaren e Shqipërisë për herën e 32-të në ndeshjen kundër Portugalisë, shifër kjo të cilën nuk e ka arritur askush para tij.
Italiani, i cili e ka marrë edhe nënshtetësinë shqiptare, në sfidën ndaj Danimarkës u barazua me gjermanin, Hans-Peter Brigel, ndërsa me ndeshjen ndaj Portugalisë, De Biasi do të bëhet trajneri që e ka drejtuar më së shumti Kombëtaren e Shqipërisë, transmeton Sportal.
Gianni e mori drejtimin e Shqipërisë më 14 dhjetor 2011 dhe që atëherë në 31 ndeshje të zhvilluara ai e ka thyer edhe një tjetër rekord. Italiani i ka rezultatet më pozitive se cilido përzgjedhës i mëparshëm i Shqipërisë. De Biasi ka arritur t’i fitojë 12 nga 31 ndeshjet e zhvilluara, ka barazuar në 8 dhe i ka humbur 11 prej tyre.
/portali DurresLajm/
