Aurelio De Laurentis nuk i ka kapërdirë mirë akuzat e bëra nga Gonzalo Higuain në ndeshjen Napoli – Juventus. Sulmuesi argjentinas fajësoi pikërisht këtë të fundit për transferimin e tij në Torino, por De Laurentis i kundërpërgjigjet duke e quajtur tradhëtar që kërkon të shpëtojë nga situata.Në një intervistë për mediat italiane presidenti i Napolit ka deklaruar se Higuain kërkon që ta ngarkojë atë me faj, por se tifozët nuk janë budallenj dhe e kanë kuptuar të vërtetën mbi të.
“Higuain mund të më drejtohet me gisht për të dalë i pastër para tifozëve, që gjithsesi nuk janë budallenj dhe e kuptojnë mjaft mirë situatën. Nëse ti je një person me shije të mira, nuk mund të tradhëtosh skuadrën ku u afirmove në nivelet botërore për të kaluar te rivalët e Juventusit. Mendoj se këtu ka një rënie të shijes dhe nuk ka më të bëjë as presidenti dhe as vëllai i lojtarit, por vetëm kultura e tij që ai tregoi se e ka të vogël”, kanë qenë fjalët e De Laurentis drejtuar Gonzalo Higuainit.
