Kryeministri izraelit, Benjamin Netanyahu, ka pezulluar një ministër të kabinetit të ekstremit të djathtë nga pjesëmarrja në mbledhjet e qeverisë, pasi ministri sugjeroi se hedhja e një bombe bërthamore në Gaza ishte “një mënyrë” për t’u marrë me krizën.
Ministri i Trashëgimisë Amichay Eliyahu u pyet të dielën herët në Radio Kol Berama, një radio-stacion fetar, nëse duhet të përdoret një armë bërthamore në Gaza, për të cilën Eliyahu u përgjigj “kjo është një mënyrë”.
Ai më vonë tha se nuk donte që përgjigja e tij të merrej fjalë për fjalë.
“Deklaratat e ministrit (Amichay) Eliyahu nuk bazohen në realitet,” shkroi Netanyahu në X, dikur Twitter. “Izraeli dhe IDF po veprojnë në përputhje me standardet më të larta të ligjit ndërkombëtar për të shmangur dëmtimin e të pafajshmëve. Ne do të vazhdojmë ta bëjmë këtë deri në fitoren tonë.”
Zyra e Kryeministrit tha më vonë për CNN-in që Netanyahu e kishte pezulluar Eliyahun nga pjesëmarrja në mbledhjet e qeverisë deri në një njoftim të dytë.
Eliyahu mbrojti komentet e tij, duke shkruar në mediat sociale: “Është e qartë për të gjithë njerëzit e arsyeshëm se deklarata për bombën bërthamore është metaforike”.
Megjithatë, ai sugjeroi ngritjen e “një përgjigjeje të fortë dhe joproporcionale ndaj terrorizmit”.
Eliyahu është pjesë e partisë së ekstremit të djathtë Otzma Yehudit, e udhëhequr nga ministri i sigurisë kombëtare i Izraelit, Itamar Ben-Gvir. As ai dhe as Ben Gvir nuk janë anëtarë të kabinetit të luftës.
Izraeli nuk e ka pranuar kurrë zyrtarisht se posedon armë bërthamore.
