Kryedemokrati Lulzim Basha duket se ka kaluar edhe natën në qytetin e Shkodrës, pasi këtë mëngjes ai është shfaqur sërish në qytetin verior, në rrugën Bujar Bishanaku duke u takuar me banorë dhe biznese të vogla përgjatë saj.
Duket se këto 2 ditë në Shkodër kanë qenë me një agjendë të ngjeshur për Bashën, të cilat ai i ka ndarë në kohë reale me ndjekësit e tij edhe në faqen e “Facebook”.
“Lagje më lagje, derë më derë, pranë njerëzve, për të dëgjuar ata e për të gjetur zgjidhjet më të mira për problemet e tyre të vogla e të mëdha. Kjo është politika që ne duam t’u ofrojmë qytetarëve, në shërbim të tyre, e jo të karrigeve. Pasiguria ekonomike dhe kërcënimi i përditshëm i rendit nga krimi, e bëjnë përherë e më të vështirë jetesën e shkodranëve dhe qytetarëve anembanë vendit. Prandaj është e domosdoshme zhbërja e këtij modeli të dështuar qeverisës. Ky ndryshim do të vijë përmes një bashkimi të vërtetë e të sinqertë të të gjithë faktorëve shoqërorë që kërkojnë fuqizimin e qytetarëve dhe forcimin e llogaridhënies të pushtetarëve. Kështu nis ndryshimi i vërtetë, kështu mund të ndërtojmë një të ardhme më të mirë për familjet shqiptare”, shkruan Basha këtë paradite.
