Interi ka zhvilluar një prej sezoneve më të shëmtuar të historisë së tij, por të paktën duhet të ngushëllohen me tifozët e tyre. Pavarësisht se zikaltrit nuk arritën të përmbushnin asnjë prej objektivave të tyre, mbështetësit e skuadrës tregojnë edhe një herë se janë më të mirët, për sa i përket kampionatit italian. Zikaltrit kanë një mesatare prej 46622 tifozësh për ndeshje, duke regjistruar një rritje prej 2.4 për qind në krahasim me sezonin 2015/16.
Pozicioni i dytë i përket Milanit, kuqezinjtë kanë koleksionuar një mesatare spektatorësh rreth 40326, me një rritje prej 6.5 për qind duke e krahasuar me sezonin e kaluar. Podiumin e plotëson Juventusi, i cili me një mesatare prej 39936 përmirëson me 3.3 për qind numrin e të pranishmëve në “Juventus Stadium”.Në top-pesëshe ndodhet Napoli (36601), me një rritje prej 5.6 për qind në krahasim me sezonin e kaluar dhe Roma (32638), me verdhekuqtë që këtë sezon kanë pësuar një rënie prej 7.2 për qind.
