SHBA– Diva e muzikës Pop, Whitney Houston, mendohet të jetë vrarë. Të paktën kështu supozon një detektiv privat amerikan. E përditshmja britanike “The Sun” raporton se Paul Huebl ka gjetur prova, përfshirë edhe materiale filmike, që vërtetojnë se këngëtarja ishte viktimë e një sulmi nga dy burra, të cilët ishin dërguar për të marrë një borxh që kishte lidhje me substanca narkotike.
Mendohet se Whitney Houston u kishte 1.5 milionë dollarë borxh disa trafikantëve të rrezikshëm para se të mësohej lajmi i vdekjes së saj në Los Angeles.
Huebl tha për ‘National Enquirer’: “Kam prova se Whitney ka qenë viktimë e një sulmi nga trafikantë droge, të cilët dërguan persona për t’i marrë asaj një shumë të madhe parash që ajo u detyrohej ”.
“Trupi i saj ka plagë klasike që i merr një person kur lufton për të mbrojtur jetën e tij. Provat do i shkojnë FBI-së në mënyrë që kjo çështje të rihapet”,- shtoi detektivi.
Whitney Houston u gjet pajetë në vaskën e dhomës së saj të hotelit në shkurt të vitit 2012. Analiza toksikologjike tregoi se 48-vjeçarja kishte ndërruar jetë, pasi ishte mbytur si pasojë e efektit të kokainës dhe problemeve me zemrën.
