Shërbimi për Çështjet e Brendshme dhe Ankesat ka pezulluar nga detyra punonjësin e policisë në Lushnjë, pasi tre ditë më parë ka dhunuar qytetarin, Amarildo Hoxha.
Sipas SHÇBA-së, për punonjësin e policisë është caktuar masa e sigurimit personal, “Detyrim për t’u paraqitur në policinë gjyqësore” dhe “Pezullim i ushtrimit të një detyre a shërbimi publik”.
Ai akuzohet për veprën penale “Kryerje e veprimeve arbitrare”.
Ky vendim vjen pasi Amarildo Hoxha, tregtar në këtë zonë, tregoi për mediat dhunën brutale që punonjës të policisë kishin ushtruar ndaj tij.
Njoftimi i plotë:
Lushnje – Pezullohet punonjësi i Policisë për veprime arbitrare
SHÇBA në bashkëpunim me Prokurorinë Pranë Gjykatës së Shkallës së Parë Lushnje, më datë 28.10.2021 ka ekzekutuar vendimin penal të Gjykatës së Shkallës së Parë Lushnje, e cila ka caktuar masën e sigurimit personal “Detyrim për t’u paraqitur në policinë gjyqësore” dhe “Pezullim i ushtrimit të një detyre a shërbimi publik” ndaj punonjësit të policisë në Komisariatin e Policisë Lushnje, Inspektor B.SH.
Hetimi në bashkëpunim të ngushtë dhe nën drejtimin e Prokurorisë së Rrethit Gjyqësor Lushnje për veprën penale “Kryerje e veprimeve arbitrare”, parashikuar nga neni 250 i Kodit Penal, pas ankesës së shtetasit A.H., i cili ka deklaruar se është dhunuar nga punonjës policie në vendin e quajtur “Rotondo e Savrës”, Lushnje.
Hetimet po vijojnë.
SHÇBA mbetet e përkushtuar në misionin e saj për garantimin e zbatimit të ligjit dhe fton qytetarët të denoncojnë çdo rast të abuzimit apo shkeljes së ligjit nga ana e punonjësve të Policisë së Shtetit duke telefonuar në numrin e gjelbër 0800 90 90.
