Një ngjarje e rëndë është parandaluar mbrëmë në qytetin e Fierit. Një 27 vjeçar, Ervin Saliaj, banues në lagjen “29 Nëntori”, është arrestuar pasi rreth orës 17:00 të ditës së djeshme, në lagjen “Apollonia”, në ambientet e një agjencie udhëtimesh, ka rrahur e kanosur për jetën ish bashkëshorten, E.S., 27 vjeçe, banuese në lagjen “8 Shkurti” Fier, punonjëse në këtë agjenci.
Nga martesa çifit kishte një fëmijë tre vjeçar, ku gjykata kishte vendosur ta mbante e ëma, por këtu nis dhe problemi i Ervin Saliaj, pasi ai nuk bie dakort me vendimin e gjykatës dhe e mban vetë fëmijën duke mos e kthyer tek e ëma.
Policia ka mbërritur menjëherë në vendngjarje dhe ka kapur Saliaj duke goditur ish-bashkëshorten e duke e kanosur atë që ajo të mos e kërkonte më atë, ndryshe do të kishte pasoja.
Dëshmitarët okularë kanë sinjalizuar uniformat blu, të cilat kanë ndërhyrë, duke parandaluar përshkallëzimin e situatës.
Policia sqaron se 27 vjecari u arrestua në kushtet e flagrancës, i akuzuar për veprat penale “Dhunë në familje”, “Kanosje serioze për hakmarrje”, “Marrja e padrejtë e fëmijës” dhe “Veprime në kundërshtim me vendimin e Gjykatës”.
