Fatmira Mustafaj, nëna e Laer Kurtit e ka të pamundur të mbajë lotët sa herë i kujtohet imazhi i djalit të saj, i cili vdiq brenda ambienteve të komisariatit nr.3 në Tiranë.
Pas raportit të bërë publik nga Avokati i Popullit, nëna e të ndjerit në një intervistë për News 24 mohoi kategorikisht faktin se djali i saj kishte probleme shëndetësore. Ajo pretendon se Laerit nuk i është dhënë ndihma e parë, e cila mund ta mbante atë në jetë.
“Djali im nuk ka pasur probleme shëndetësore, por edhe sikur i duhej dhënë ndihma e shpejtë. Dua të më qetësohet shpirti dhe të dalë e drejta. Djali im ka ikur nga duart e atyre. Iku nga dhuna. Nuk di. Djali im ishte si gjithë të tjerët, nuk ishte në atë gjendje që të përfundonte ashtu, por thjeshtë nuk i është dhënë ndihma e parë. Fatkeqësisht unë nuk besoj dhe jam shumë e zhgënjyer këtë shtet sepse vë në faj personat që ikin nga kjo jetë. Nga aq sa pash nga rrethanat si iku, vë në faj efektivët që kapën djalin tim”, tha ajo.
