Ish kryeministri Sali Berisha ka mbajtur takimin me demokratët e Shkodrës ashtu siç e njoftoi ditën e enjte pasi doli nga prokuroria ku dëshmoi në lidhje me protestën e 8 janarit.
Berisha nuk la pa përmendur lëvizjen e ndërmarrë të cilën e cilësoi si historike dhe më tej bëri thirrje ndaj aktorëve ndërkombëtarë, duke u bërë me dije se tashmë kishte nisur një revolucion i pandalshëm por paqësor.
“Kjo betejë e jona është absolutisht për liri dhe vetëm për liri. Ne votojmë, Rama i numëron me bandat, paratë e patronazhistët e tij. Ai në mënyrë të tmerrshme këtë model e transplantoi në krahun tonë. Në qoftë se socialistët nga 2009 deri sot nuk kanë votuar asnjëherë në partinë e tyre, cili është votimi në PD e Lul Bravës? Votimi më i turpshëm në histori ishte ai në anti-Kuvendin e tij. Vota e shumëzuar me 3-4 fishin, u shfaq si vota e 5 mijë demokratëve. A ka përdhosje e dhunim më të madh se ky për votën e lirë? Të paktën ai tjetri haptas deklaron se nuk ka lidhje më me votën, se s’ka lidhje me lirinë, kurse ky në mënyrën më të shëmtuar kërkon të mashtrojë, të servirë 1800 për 5400. Beteja jonë pra është për votën e lirë, sepse nëse ne nuk votojmë të lirë, e dimë që kemi diktaturë dhe kurrë demokraci. Ndaj, ju ftoj të ngrihemi me pasionin tonë për lirinë, me dashurinë tonë për Shqipërinë e kombin, në këtë revolucion për të përmbysur narkoshtetin, për të ecur të sigurt në një shoqëri të lirë, në një Shqipëri që ecet drejt BE-së.
Përsëri, thirrja ime është se ky është një revolucion i pandalshëm. Demokratët më 8 janar kërkonin të nxirrnin nga shtëpia e tyre banditët që kishin pushtuar shtëpinë. Protestat tona nuk do të ndalen deri në fitoren tonë. Ata që mbështesin Edi Ramën e Lul Bashën për të marrë peng pluralizmin, do të dështojnë. E ardhmja është e jona. Është e vërtetë që Basha është i Ramës, por e vërteta është se nuk ka lidhje me demokratët dhe selinë absolutisht që ne do ta çlirojmë nga bandat e turpshme. Mos të keni mëdyshje. Kurrë ne nuk japim pluralizmin, kurrë ne nuk japim demokracinë, kurrë ne nuk japim PD-në, kurrë ne nuk shkelmojmë interesat e Shqipërisë. Ju ftoj nga kjo ditë, flakën, dritën e këtij revolucioni ta çojmë te çdo votër shqiptare, të rikthejmë fitoren plebishitare të vitit 1992”, u shpreh ish-kryeministri Berisha.
