Kur bëhet fjalë për humbjen e peshës, përballemi me një sërë dietash, praktikash, zakonesh apo suplementesh, të cilat na ofrohen si zgjidhja “ideale” për të humbur peshë.

Megjithatë edhe pas shumë përpjekjesh për të ulur disa kilogramë, dietologët shpjegojnë se ka shumë arsye pse peshorja nuk ndryshon.

Përpos ushqimit, gjumi, stresi dhe orari i konsumimit të ushqimit luajnë një rol të rëndësishëm.

Sipas Anna Groom, dietologe dhe zëdhënëse e Shoqatës Britanike të Dietologjisë tha për The Telegraph, se edhe pse mund të jetë tunduese të ulësh pak peshën e fituar gjatë festave të fundvitit me “dieta të shpejta”, efektet e saj janë shpesh afatshkurtra.

“Ndërsa dietat mund të japin fillimisht rezultate, ato shpeshherë bëhen kufizuese duke i çuar individët në ankth dhe frustrim të mëtejshëm. Për humbjen e peshës duhet të kini kujdes mënyrën e të menduarit, nivelin e aktivitetit dhe stilin e jetesës në përgjithësi”, shprehet Groom.

E duke pasur parasysh këto, gabimet që bëhen me qëllim humbjen e peshës janë të shumta, të cilat kufizojnë në arritjen e rezultateve te dëshiruara.

Sipas Dr. Abby Hyams, drejtoreshë mjekësore në Medicspot, konsumimi i paktë i ushqimit është një nga gabimet që bëhet shpeshherë, pasi kur kaloritë që konsumohen janë shumë të ulëta, trupi kundërsulmon.

“Truri ngadalëson metabolizmin për të kursyer energji dhe rrit oreksin tuaj. Është mënyra e trupit për t’ju mbrojtur nga uria e perceptuar”, tha Dr. Abby Hyams për The Telegraph. 

Sipas saj, humbja e peshës është më e ngadaltë, por do të kesh energji për të jetuar jetën dhe për t’u ushtruar.

Konsumimi i pamjaftueshëm i proteinave është gjithashtu i padobishëm, nëse qëllimi është humbja e peshës.

Së fundmi, proteina është një fjalë kyçe e dietave, e cila gjendet natyrshëm tek mishi, peshku, vezët, nënproduktet e qumështit dhe sipas ekspertëve proteina rrit ndjesinë e ngopjes dhe ul hormonin e urisë, madje mund edhe të përshpejtojë metabolizmin.

“Do të hanë një sallatë pa proteina, pastaj do të pyesin veten pse po vdesin urie deri në orën 3 të pasdites”, shprehet Hyams.

Nga ana tjetër, të mos konsumosh fibra është një tjetër gabim, pasi sipas Dr. Emily Leeming, ekspertes së mirëqenies së zorrëve, konsumimi i vakteve duhet bërë me sasi të larta fibrash për të shmangur ndjesinë e urisë mes vakteve.

Dr. Leeming rekomandon zëvendësimin e bukës së bardhë, makaronave dhe orizit me varietete të drithërave të plota.

Një tjetër ‘zakon i keq’ konsiderohet dhe ngrënia e ushqimeve pa mendje, konsumimi i biskotave teksa po sheh diçka, apo marrja e patateve të skuqura nga pjata e partnerit. Të gjitha këto konsiderohen kalori të shtuara, ndaj sipas ekspertëve marrja e ushqimit duhet të bëhet e monitoruar dhe në mënyrë të vetëdijshme.

Duhet patur gjithashtu kujdes nga kaloritë e fshehura të pijeve të gazuara, lëngjeve të frutave dhe kafeve me qumësht, si dhe nga çokollatat e nxehta të cilat mund të kenë deri në 500 kalori, çajrat me qumësht ose një gotë verë çdo natë, sigurisht mund të shtojnë qindra kalori në javë.

Humbja e peshës me kardio është më efektive se ajo me pesha. Kardio konsiderohet një stërvitje shumë e mirë për të qenë në formë, për organizmin dhe për shëndetin metabolik.

“Ndërtimi i muskujve është arma juaj sekrete për menaxhimin afatgjatë të peshës”, thotë Dr. Hyams.

 Neglizhenca e dietës apo e regjimit ushqimor në fundjavë është një tjetër armik për humbjen e peshës.

Gjithashtu duhet patur kujdes nga konsumimi i vakteve në kohë të gabuara.

Sipas ekspertëve, shumë njerëz përqendrohen tek agjërimi në mëngjes, gjë që mund të nënkuptojë teprim në mbrëmje.

Një studim në Jama Internal Medicine zbuloi se ngrënia e hershme me kufizime kohore midis orës 7 të mëngjesit dhe 3 të pasdites çoi në 50 për qind më shumë humbje peshe sesa ngrënia gjatë 12 orëve ose më shumë.

Gjatë ditës, porcionet e ushqimit duhet të merren jo të mëdha, veçanërisht në konsumimin e drithërave, makaronave apo orizit.

Duhet të mos lëmë pa përmendur rëndësinë e gjumit në humbjen e peshës.

Mungesa e gjumit, veçanërisht më pak se gjashtë orë në natë, shkakton drejtpërdrejt shtim në peshë duke prishur hormonet e urisë duke rritur kortizolin dhe duke rritur dëshirën për ushqime me shumë kalori dhe sheqer.

Sipas ekspertëve, lodhja zvogëlon aktivitetin fizik, duke nxitur më tej shtimin në peshë, ndërsa gjumi i dobët ul edhe tolerancën ndaj glukozës.

Moskujdesi ndaj zorrëve është një tjetër gabim i rëndësishëm për humbjen e peshës pasi zorra është “shtëpia” e triliona mikrobeve, të cilat ndihmojnë në zbërthimin e ushqimit, mbështesin mukozën e zorrëve dhe prodhojnë komponime që ndikojnë në tretje, inflamacion, metabolizëm dhe funksion imunitar.

Ekspertët sugjerojnë konsumimin e frutave dhe perimeve, bishtajoreve, drithrave të plota dhe ushqimeve të fermentuara, si kosi apo turshitë.

“Një nga gabimet më të mëdha në dietë është të besosh se vullneti është i mjaftueshëm”, tha për The Telegraph Sandra Roycroft-Davis, e cila është themeluese e Slimpod dhe autore e librit “The Weight’s Over – Take Back Control”.

Sipas saj, shpesh dimë çfarë duhet të konsumojmë por nuk e bëjmë dot, pasi deri në 90% e asaj çfarë hamë drejtohet nga nënndërgjegjia.

“Vullneti është si një bateri, mbaron. Nuk është se ju mungon disiplina, truri juaj po bën atë që mendon se ju nevojitet. Dietat luftojnë trurin tuaj. Në vend të kësaj, ju duhet ta ritrajnoni atë”, pohon Roycroft-Davis.