Ukraina ka dërguar dronë interceptues dhe personel ushtarak në Jordani, ndërsa vendet e Lindjes së Mesme po sprapsin sulmet iraniane ndaj infrastrukturës dhe aseteve ushtarake amerikane gjatë luftës SHBA-Izrael në Teheran. Mësohet se, presidenti Volodymyr Zelensky konfirmoi se një ekip ukrainas u nis të premten për në Jordani, e cila strehon asetet ushtarake amerikane në bazën ajrore Muwafaq Salti.
Masa pasoi një kërkesë të SHBA-së, tha Zelensky, ndërsa Uashingtoni kërkon teknologji më të lirë për të kapur raketat iraniane që synojnë asetet mbrojtëse izraelite dhe amerikane, si dhe infrastrukturë të tjera në Katar, Kuvajt, Bahrein, Arabinë Saudite dhe Emiratet e Bashkuara Arabe.
Siç raporton aljazeera në analizën e saj , SHBA-të aktualisht po përdorin sisteme të mbrojtjes ajrore si raketat Patriot, bateritë e raketave THAAD dhe avionët e Sistemit të Paralajmërimit dhe Kontrollit Ajror (AWACS) për të kapur dronët dhe raketat iraniane që synojnë objektet e saj ushtarake në rajon.
Irani po vendos dronët e tij të lirë Shahed të prodhuar në vend në të gjithë Gjirin Persik dhe besohet se ka mijëra të tillë në magazinë. Këto janë të njëjtat dronë që i ka furnizuar Rusisë gjatë luftës së Moskës në Ukrainë. Kievi, i cili prej kohësh ka kërkuar sisteme mbrojtëse më të përparuara amerikane, ka zhvilluar teknologji për të prodhuar në masë dronë interceptues shumë më të lirë, për t’iu kundërvënë sulmeve të dronëve nga Rusia.
Ukraina po ndërton mijëra dronë interceptues me kosto të ulët për t’iu kundërvënë dronëve iranianë të tipit Shahed gjatë luftës Rusi-Ukrainë. Pasi dështoi të siguronte mjaftueshëm sisteme armësh me teknologji të lartë nga aleatët e saj, siç janë sistemet amerikane të mbrojtjes nga raketat Patriot, Kievi u detyrua të inovonte në vitin 2025. Tani, është bërë një nga prodhuesit kryesorë të “Shahed Killers” në botë.
