DURRES, 22 shkurt 2013 – Arrestohen me akuzën e veprimeve të paligjshme dy kontrollorë të policisë së Durrësit. Ata dyshohet se kanë lejuar kalimin në kufirin shqiptar të shtetasve që nuk u lejohej hyrja në zonën Shengen. Dy shtetasit Mustafa Meta dhe Rudi Gaxhe, me detyrë kontrollorë të policisë kufitare ranë në pranga pas hetimeve të SHKB dhe Ministrisë së Brendshme. Sipas hetimeve, ata regjistronin në kufi persona që nuk ndodheshin në Shqipëri duke vendosur në regjistra të dhëna fiktive.

Ministria e Brendshme deklaroi se Shërbimi i Kontrollit të Brendshëm në Ministrinë e Brëndshme, duke vlerësuar çdo informacion të ardhur, në PKK-të Republikës së Shqipërisë, ka konstatuar raste kalimesh të shtetasve shqiptarë, të cilëve nuk u lejohet dalja në hapësirën Shengen, pasi janë përcaktuar si deportivë apo me mungesë dokumentacionit të rregullt.

Gjatë punës hetimore, u konstatua se ky fenomen përfshinte edhe regjistrimin fiktiv të shtetasve, që nuk ndodhen aktualisht në territorin e vendit tonë, nga ana e kontrollorëve, të cilët bashkëpunonin me punonjës policie apo nënpunës të agjensive të udhëtimit dhe, të gjitha këto, në shkëmbim të përfitimeve monetare.

Bazuar në këto të dhëna, Shërbimi i Kontrollit të Brendshëm  Durrës, në bashkëpunim me Prokurorinë e Rrethit Gjyqësor, Durrës prej 2 muajsh vijonte hetimet, duke aplikuar metodat speciale të hetimit, ku si rezultat u bë e mundur zbardhja dhe dokumentimi i veprimtarisë së kundraligjshme të shtetasve;

1-    Mustafa  Shaqir Meta, dt 28.04.1966, me detyrën e punonjësit të policisë në Drejtorinë e Kufirit dhe Migracionit, në PKK- Porti Durrës.

2-    Rudi  Rait  Gaxhaj, dt 10.12.1972, me detyrën e kontrollorit në PKK-në Kakavijë.

3-    Nertil Refail Sula, dt 05.05.1983, shofer në autobuzin e linjës Tiranë- Athinë, të agjensisë së udhëtimit Inter-Lines.

Më datën, 21 shkurt 2013,  u krye arrestimi i të tre shtetasve të sipërpërmendur, pasi në ngarkim të tyre janë konstatuar prova të mjaftueshme se, në bashkëpunim me njëri- tjetrin kanë kryer elementë të figurës së krimit të “ Korrupsionit pasiv të kryer nga persona, që kryejnë funksione publike”, si edhe falsifikim të vulave, stampave ose formularëve, vepra të parashikuara në nenet 259, 190 dhe 25, të Kodit Penal.

Ministria e Brendshme, garanton edhe njëherë qytetarët se Shërbimi i Kontrollit të Brendshëm, në mbështetje të objektit të punës së përcaktuar në nenin 3 germa “a” të Ligjit, “Për Shërbimin e Kontrollit të Brendshëm në Ministrinë e Brendshme”, do të vijojë me përkushtim dhe rigorozitet punën për parandalimin, zbulimin dhe dokumentimin e veprimtarisë kriminale që kryhet nga punonjësit e Policisë së Shtetit, pavarësisht gradës apo funksionit të tyre.