Policia e Durrësit ka dhënë detaje të reja lidhur me ngjarjen e pasdites së djeshme, ku një 31-vjeçar plagosi me armë zjarri 70-vjeçarin, Fadil Hunda brenda një lokali për shkak të një borxhi të pashlyer.
I riu, banues në Shijak, akuzohet për veprat penale “Vrasja me dashje”, mbetur në tentativë dhe “Mbajtja pa leje dhe prodhimi i armëve, i armëve shpërthyese dhe municionit”.
Ngjarja ndodhi rreth orës 19:30 në një lokal në lagjen nr.17 të qytetit të Durrësit.
Sipas uniformave blu, 70-vjeçari, banues në Durrës, u qëllua për shkak të një borxhi të pashlyer ndërsa vijon të jetë në kujdesin e mjekëve.
Njoftimi i policisë:
Durrës
Arrestohet në flagrancë 31-vjeçari që tentoi të vriste me armë zjarri pistoletë, një 70-vjeçar, dje në një lokal.
Specialistët e Sektorit për Krimet e Rënda të DVP Durrës, në përfundim të veprimeve hetimore të kryera në drejtimin e Prokurorisë, për zbardhjen e rrethanave të ngjarjes së ndodhur dje, rreth orës 19:30, në një lokal në lagjen nr.17, ku për shkak të një borxhi të pashlyer, mbeti i plagosur me armë zjarri pistoletë, shtetasi F. H., 70 vjeç, banues në Durrës, i cili vijon të jetë në kujdesin e mjekëve, arrestuan në flagrancë autorin e dyshuar të këtij rasti, shtetasin:
A. H., 31 vjeç, banues në Shijak, për veprat penale “Vrasja me dashje”, mbetur në tentativë dhe “Mbajtja pa leje dhe prodhimi i armëve, i armëve shpërthyese dhe municionit”.
Arma e zjarrit pistoletë e dyshuar e përdorur për plagosjen u sekuestrua në cilësinë e provës materiale.
Shtetasi A. T., që u shoqërua dje, pas ngjarjes, në përfundim të veprimeve hetimore, u la i lirë.
Materialet procedurale i kaluan Prokurorisë, për veprime të mëtejshme.
