Për rreth një orë, zërat melodiozë të 30 të rinjve të qytetit të Durrësit kumbuan në sallën e QKF-së mbrëmjen e së hënës duke sjellë për publikun e pranishëm disa nga hitet më ikonike ndërkombëtare të muzikës rok.
Nën drejtimin e udhëheqëses artistike Olta Juba, kori i të rinjve të qytetit bregdetar solli për artdashësit koncertin “Këngët e rinisë”, ku energjia dhe mesazhet pozitive që këto hite mbarëbotërore përcjellin dominonin në skenë.
Me këngë të interpretuara nga Queen, Tina Turner, Scorpions, Michael Jackson etj, solistët dhe kori i të rinjve krijuar në sallë një atmosferë elektrizuese, ku duartrokitjet e publikut nuk mund të mungonin.
Një mbrëmje dedikuar talentit, kreativitetit dhe zërit të rinisë, pikërisht në ditën Kombëtare të Rinisë.
Ky nuk është koncerti i parë i korit të talentuar të të rinjve, por nuk do të jetë as i fundit.
Në data të rëndësishme të historisë së Shqipërisë, kori me disa nga emrat më të mirë në fushën e talenteve të reja në gjininë e këngës, ka sjellë në skenë për publikun durrsak repertor të përzgjedhur dhe gjallërinë rinore që i karakterizon këta këngëtarë të ardhshëm.
M.B.
