Policia Rrugore e Durrësit ka bërë bilancin e një jave pune në qytetin bregdetar.

Në njoftimin e shpërndarë për mediet, blutë e Durrësit bëjnë me dije se gjatë javës së kaluar janë arrestuar 4 drejtues mjetesh, janë pezulluar 53 leje drejtimi, nga të cilat 3 për drejtim të automjetit nën efektin e alkoolit dhe 50 për drejtim të automjetit me shpejtësi tej normës së lejuar.

Gjithashtu janë vendosur 1195 masa administrative, për shkelje të ndryshme.

Njoftimi i plotë:

Policia Rrugore e Durrësit, krahas masave të shtuara për menaxhimin e fluksit gjatë sezonit turistik, vijon kontrollet e pandërprera për parandalimin e aksidenteve rrugore, evidentimin dhe ndëshkimin e drejtuesve të mjeteve që shkelin rregullat e qarkullimit rrugor.

Gjatë një jave, si rezultat i shtimit të kontrolleve dhe falë bashkëpunimit me qytetarët, të cilët kanë denoncuar në numrin pa pagesë 112 dhe në Komisariatin Dixhital, shkeljet e konstatuara, nga shërbimet e Policisë Rrugore janë arrestuar 4 drejtues mjetesh për veprën penale “Drejtimi i automjeteve në mënyrë të parregullt”.

Gjithashtu, janë pezulluar 53 leje drejtimi, nga të cilat 3 për drejtim të automjetit nën efektin e alkoolit dhe 50 për drejtim të automjetit me shpejtësi tej normës së lejuar.

Shërbimet e Policisë Rrugore kanë vendosur 1195 masa administrative, për shkeljet si më poshtë:

• 253 masa administrative, për parakalim të gabuar;
• 43 masa administrative, për përdorim të aparatit celular gjatë drejtimit të mjetit;
• 64 masa administrative, për mospërdorim të rripit të sigurimit;
• 313 masa administrative, për qarkullim me shpejtësi mbi normën e lejuar;
• 143 masa administrative, për ndalim/pushim të mjetit në kundërshtim me sinjalistikën rrugore;
• 15 masa administrative, për mosvendosje të kaskës mbrojtëse, si dhe
• 364 masa administrative, për shkelje të rregullave të tjera të Kodit Rrugor.

Policia Rrugore e Durrësit falënderon drejtuesit e mjeteve dhe këmbësorët që respektojnë rregullat e qarkullimit rrugor, si dhe fton të gjithë qytetarët që të denoncojnë në numrin pa pagesë 112 dhe në Komisariatin Dixhital, çdo rast të shkeljeve të rregullave të qarkullimit rrugor, duke u garantuar reagim të shpejtë dhe të paanshëm.