DURRES – Gazeta “Tirana Observer” ka botuar sot listat e kandidatëve për deputetë të tre partive kryesore, për qarkun e Durrësit, që sipas saj mund të përfshihen në listat përfundimtare që pritet të dorëzohen në KQZ në datë 3 maj. E përditshmja ka botuar emrat që sipas saj PD, PS dhe LSI mund të përfshijnë në listën e kandidatëve për në Kuvendin e Shqipërisë për qarkun e Durrësit.

Bie në sy fakti se në listën e kandidatëve të Partisë Socialiste është përfshirë edhe kryetari i bashkisë së Durrësit, Vangjush Dako, kandidatura e të cilit duket tani për tani e pamundur, sepse nëse do të ndodhte, do të duhej të dorëzonte postin që mban aktualisht, si qytetari i parë i qytetit bregdetar. Përveç emrit të kryebashkiakut Dako, emrat e tjerë të përfshirë në listë janë aktualisht deputetë të PS-së, dhe 4 prej tyre janë zgjedhur me votat e qytetarëve durrsakë.

Ndërkohë në listën e Partisë Demokratike janë përfshirë në listë krahas emrave që tashmë e përfaqësojnë Durrësin dhe Krujën në parlament edhe prurje të reja si Armand Teliti, që pak ditë më parë u emërua në postin e Kryetarit të Këshillit të Qarkut apo Zamir Ramadani, drejtori i përgjithshëm i Hekurudhave Shqiptare.

Lista e kandidatëve të LSI-së kryesohet nga deputeti Lefter Koka, ish kryetar bashkie i Durrësit, dhe njeriu më me influencë në qytetin bregdetar nga partia e Ilir Metës.

Nga kontaktet që Durreslajm.com mori me selitë e partive politike në Durrës, këto të fundit deklarojnë se është ende herët për të folur për lista përfundimtare të kandidatëve për deputetë, pasi procesi është ende në fazën e diskutimit, por nuk mohojnë faktin se disa nga emrat e përmendur në lista do të përfshihen në garën elektorale të 23 qershorit.

Lista e kandidatëve të tre partive kryesore sipas gazetës “Tirana Observer”.

PD

1.Eduart Halimi

2.Armand Teliti

3.Albana Vokshi

4.Zamir Ramadani

5.Igli Cara

6.Halit Shamata

7.Osman Metalla

8.Ylli Lama

9.Ndriçim Babasi

10.Eglantina Bekteshi

 

PS

1.Blendi Klosi

2.Eglantina Gjermeni

3.Gazmir Bizhga

4.Vangjush Dako

5.Klodiana Spahiu

6.Edison Konomi

 

LSI

1.Lefter Koka

2.Iljaz Labi

3.Genci Alizoti

4.Spartak Braho