DURRËS, 3 dhjetor 2014 – Në Durrës mund të bëhet edhe një lloj turizmi gjithëvjetor, ekzotik: “Turizëm Ushtarak i Luftës së Ftohtë”, pasi nëntoka e qytetit bregdetar është dyfish e pasur me monumente 3-mijëvjeçare dhe “monumente” të inxhinierisë ushtarake 30-35-vjeçare.
Kodrat piktoreske fshehin një qytet tjetër nëntokësor, shumë-shumë më i pasur se “Bunk-art”-i i Tiranës, mjafton të organizohet një partneritet shtet (bashki, prefekt, ministri Mbrojtjeje) – privat (operatorë turistikë me paketa “ushtarake”, biznese ushqimore etj.).
Këto ide i ka shprehur dhe një nga ekspertët më të shquar të inxhinierisë ushtarake, Besnik Alibali, i cili ka bërë një listim të objekteve nëntokësore:
• Nën rrugën e “Stan”-it dhe kodrën e Vilës Mbretërore
vendstrehim për parkimin e 300 automjeteve të tonazhit të rëndë. Janë 6 tunele, në hapësira të komandueshme.
• Në Kodrën e Kokomanëve
tuneli i ish-“Vendkomandës-komiteti i partisë”, i betonuar, me 85 objekte (zyra, fjetore, salla, mjedise hidrosanitrare etj.).
• Te “Depoja e Vangjelit”
tunel-frigorifer me kapacitet 300 tonë; përdorur në fund të viteve ’80 të shekullit të kaluar për depozitim të prodhimeve të mishit, djathit, perimeve etj.
• Përtej liqenit artificial në kodrat e qytetit:
magazinat e tregtisë, me ndarje me shumë xhepa e mjedise.
• Afër ish-repartit ushtarak të tankeve:
spitali civil, i projektuar për 500 shtretër, i plotësuar me të gjitha mjediset e mjekimit e shërbimit (salla operacionesh, farmaci etj.), një depo uji me rezerva të mjaftueshme për një vit; por mungon rrjeti hidraulik dhe elektrik, si dhe aspirimi dhe kondicionimi;
stalla e lopëve me kapacitet mbarështimi për 500 krerë, përfunduar edhe me ajrim;
fabrika e bukës për 80 mijë banorë;
fabrika e blojës, e përfunduar dhe e pajisur;
punishte rrobaqepësie e betonuar;disa punishte të tjera.
/th. m. agjencia e lajmeve “Dyrrah”/
