Me një portret dhe talent të rrallë. Pozon për reklama, interpreton në filma. Prej dy vitesh edhe kërcen. Për fëmijët thuhet që rriten me ditë, por Emily rritet me gjithë suksesin kaq shpejt. Si është të rrisësh një fëmijë të bërë të famshëm kaq herët? Ilir Shaqiri tregon nga roli i babait, por edhe i mësuesit prind.

Po t’ia shkruash emrin në Google, menjëherë të shfaqen videot në Youtube, fragmente nga emisionet televizive, foto, spote publicitare, shkrime gazetash e revistash ku përmendet emri i saj. Ajo herë është duke kërcyer, herë me makijazhin e roleve të filmave e herë duke pozuar. E kuptuat që bëhet fjalë për një person të famshëm… Ajo që e bën të veçantë historinë, është që ky personazh është vetëm 10 vjeç . Ca më shumë për ne, fakti që është vajza e balerinit dhe koreografit shqiptar, Ilir Shaqiri. Nëse nuk e keni parë asnjëherë deri tani Emily-n, po ju lajmërojmë që do bini menjëherë në dashuri me fytyrën e saj prej engjëlli. 

Si ka ndodhur me agjentët që kërkojnë vazhdimisht fytyra të reja për kaste spotesh. Fakti që Emily është vajza e një aktoreje, Emanuela Morinit e njohur për interpretimin te  “Vivere” dhe “Un posto al sole”, ka qenë një garanci më shumë që ajo vajzë e vogël me sy të kaltër e flokë të artë, do dinte të sillej para kamerave. Dhe kështu ka ndodhur! Pas fotove të para, realizoi të tjera, pastaj edhe spote reklamash televizive. Deri sa, një ditë, e kërkuan për të interpretuar edhe në filma.