Një incident i rëndë ajror ka ndodhur mëngjesin e së hënës në SHBA, kur një avion privat me pesë persona në bord doli nga pista dhe përfundoi në ujërat e gjirit Coos, pranë aeroportit Southwest Oregon Regional.
Ngjarja ndodhi rreth orës 06:00 me orën lokale. Menjëherë pas aksidentit, katër pasagjerët dhe një anëtar i ekuipazhit u shpëtuan dhe u transportuan në spital. Gjendja e tyre shëndetësore nuk është bërë ende publike.
Shkaqet e daljes nga pista mbeten të paqarta, ndërsa hetuesit federalë dhe autoritetet e aeroportit janë duke zhvilluar hetime për të përcaktuar arsyet e aksidentit.
Për shkak të ngjarjes, aeroporti është mbyllur përkohësisht për të gjithë trafikun ajror, ndërkohë që ekipet e emergjencës janë angazhuar në pastrimin e materialeve të rrezikshme dhe në nxjerrjen e mbetjeve të avionit nga uji.
Aeroporti ndodhet përgjatë bregut të Paqësorit, rreth 80 kilometra në veri të kufirit me Kaliforninë.
