2 qershor 2015 –Sokol Çikalleshi mund të transferohet në Portugali te Benfica gjatë merkatos së verës. Paraqitjet e tij në këtë sezon me RNK Split kanë tërhequr vëmedjen e skuadrave të ndryshme europiane, madje edhe të klubit më të titulluar portugez.
Sipas mediave luzitane, që u referohen raportimeve nga Kroacia, fundjavën e kaluar sulmuesi i kombëtares shqiptare është vëzhguar nga afër nga emisarë të Benficas. Gjithsesi në drejtim të RNK Split ende nuk ka mbërritur një ofertë konkrete.
24-vjeçari ka deklaruar më parë se kampionatin kroat e sheh si trampolinë drejt futbollit elitar Europian, ndërkohë që nuk kanë munguar zërat për interesimin e disa skuadrave të Serisë A, apo të Stuttgartit në Bundesligë. Sokol Çikalleshi ka zhvilluar në total 39 ndeshje me RNK Splitin mes kampionatit dhe Kupës, duke shënuar 13 gola.
Që nga 2014-a është pjesë e përfaqësueses kuqezi, me të cilën ka luajtur në 8 takime, por pa mundur të shënojë. Kartoni i tij aktualisht vlerësohet rreth 2.5 milionë euro.
/agjencia e lajmeve “Dyrrah”/
