Duket e pabesueshme, por një numër gjithnjë e më i madh ekspertësh po hetojnë idenë se meshkujt mund të përjetojnë luhatje hormonale mujore të ngjashme me ciklin menstrual të grave. Shkencëtarët kanë vënë re se disa meshkuj shfaqin simptoma si lodhje, nervozizëm, ndjeshmëri të shtuar dhe uri të papritur disa ditë të muajit.
Endokrinologu sllovak Peter Celec nga Universiteti Comenius në Bratislavë ka publikuar një studim ku sugjeron se nivelet e testosteronit – hormoni kryesor mashkullor – ndryshojnë gjatë muajit. Edhe pse ende mungojnë provat për një “cikël mujor” të mirëfilltë tek meshkujt, ideja mbetet objekt diskutimi në mjedisin shkencor.
Ekspertët shpjegojnë se testosteroni ndikon jo vetëm në jetën seksuale, por edhe në metabolizëm, humor dhe shëndetin e përgjithshëm. Luhatjet në këtë hormon mund të ndikojnë drejtpërdrejt në sjelljen dhe ndjeshmërinë emocionale. Kjo gjendje, sipas profesor Peter Schlegel nga Universiteti Cornell, njihet edhe si “Sindroma e mashkullit të irrituar”, me simptoma si ndjeshmëri e shtuar, lodhje dhe nervozizëm.
Një tjetër faktor që ndikon në këtë gjendje është stresi. Sipas ekspertëve, stresi i vazhdueshëm mund të rrisë prodhimin e kortizolit – hormonit të stresit – duke e bërë më të vështirë menaxhimin e ankthit dhe emocioneve, veçanërisht për meshkujt më të ndjeshëm.
Edhe pse një cikël mujor mashkullor në kuptimin tradicional nuk është i provuar, studiuesit bien dakord se luhatjet hormonale dhe ndikimi i stresit në gjendjen emocionale janë të vërteta – dhe ndonjëherë, të vështira për t’u menaxhuar.
