Shtetasit e huaj që do të blenë një apartament në Shqipëri në vlerën e 150 mijë eurove, menjëherë do të marrin të drejtën e nënshtetësisë shqiptare. Kjo parashikohet në një projektligj të Ministrisë së Zhvillimit Ekonomik dhe Ministrise se Puneve të Brendshme, ndërsa është duke u diskutuar nga ministritë e tjera, përpara se të kalohet për miratim në qeveri. Drafti synon të ndihmojë sektorin e ndërtimit, duke i krijuar mundësi ndërtuesve që të shesin apartamentet të cilat prej kohësh kanë mbetur bosh. Ministri në detyrë i zhvillimit ekonomik Arben Ahmetaj sqaron se cdo i huaj që kërkon të blejë një apartament në vlerën e 150 mijë eurove, qoftë për të jetuar qoftë si një shtëpi pushimi, automatikisht merr shtetësinë shqiptare. Por, sipas Ahmetajt, ky proces nuk do të thotë se ndaj individit nuk do të zbatohen filtrat e sigurisë. Drafti në fjalë duket se është një shtesë në ligjin e miratuar më parë nga qeveria "Berisha", e cila i jepte të drejtën e shtetësisë cdo të huaji që do të investonte në Shqipëri 200 mijë dollarë.