· BEFASIA. Personalizimi i diplomacisë nëpërmjet futjes “mik” të një kryebashkiaku tek PS-ja!
14 gusht 2015 – Kinezët orvaten të fusin “mik” kryetarin e bashkisë së Durrësit Vangjush Dako për të ndikuar te Kryeministri Edi Rama në liberalizimin e vizave. “Dyrrah”-u ishte i pranishëm, kur të premten në mesditë, më 14 gusht 2015, gjatë një takimi në ndërtesën e bashkisë së Durrësit, pas nënshkrimit të një memorandumi bashkëpunimi, kryetari i bashkisë së qytetit 5,5 milionë banorësh, Shantou Zheng Renhao, i sugjeroi kryebashkiakut të Durrësit Vangjush Dako të kërkojë nga PS-ja liberalizimin e vizave me Kinën. Këtë kërkesë e mbështeti dhe ambasadorja e Republikës Popullore të Kinës në Tiranë, Jiang Yu, që shoqëronte delegacionin e gjerë. Dako ka dëgjuar i habitur përkthyesen e ambasadës kineze Wang Xianya. Kryebashkiaku i qytetit nr. 2 të Shqipërisë deklaroi se nuk e dinte që turistëve, të cilët duan të vizitojnë Shqipërinë e Durrësin, sipas Renhao-s, duhet të marrin viza Shengen për të hyrë në Shqipëri dhe nuk mund të vijnë drejtpërdrejt në Rinas, por nga një vend evropian. Po ashtu, kryebashkiaku i Shantout shtroi nevojën e hapjes së një linje të posaçme ajrore Pekin-Tiranë. Nënteksti kinez ishte: doni turistë dhe investime, bëhuni më fleksibël.
Gjithsesi, është befasuese kërkesa kineze drejtuar një kryebashkiaku, si të ishte Ministër i Punëve të Jashtme. Për më tepër kur bëhet nga ambasadorja e shtetit më të madh të botës.
/th. m. agjencia e lajmeve “Dyrrah”/
