Në mbyllje të vizitës dy ditore në Shqipëri të grupit të ekspertëve vlerësues të ICRG/FATF për ecurinë e zbatimit të Planit të Veprimit u zhvillua një takim i nivelit të lartë.
Në takim ishin të pranishëm edhe zëvendëskryeministrja, njëherësh ministrja e Infrastrukturës dhe Energjisë, Belinda Balluku, ministrja e Financës dhe Ekonomisë, Delina Ibrahimaj, ministri i Brendshëm, Taulant Balla, etj.
Zv/kryeministrja Balluku tha se “në takim ekspertët e Joint Group të ICRG/FATF, i njohëm me rezultatet e reformave të ndërmarra nga qeveria shqiptare vitet e fundit në fushën e parandalimit të pastrimit të parave dhe financimit të terrorizmit”.
Ndërsa ministrja Ibrahimaj theksoi se “ky takim u organizua për progresin e Shqipërisë në luftën kundër pastrimit të parave, si dhe për daljen nga lista e vendeve në monitorim e njohur edhe si “lista gri”.
“Progresi thelbësor i Shqipërisë në këtë drejtim, përmes reformave, u vlerësua nga ekspertët, të cilët i siguruam gjithashtu se do të vijojmë me po të njëjtin angazhim në përmbushje të rekomandimeve të FATF dhe MoneyVal”, tha Ibrahimaj.
