Një grup ekspertësh të Kombeve të Bashkuara i kërkuan të mërkurën Britanisë që të riatdhesonte një grua të privuar nga shtetësia pasi u largua nga vendi në moshën 15-vjeçare për t’u martuar me një luftëtar të Shtetit Islamik.
Shamima Begum, tani 24 vjeçe, e cila jeton në një kamp refugjatësh në Sirinë veriore, humbi një apel muajin e kaluar kundër vendimit për heqjen e shtetësisë së saj britanike. Një grup prej pesë raportuesish të posaçëm të OKB-së shprehën shqetësim të thellë për vendimin e 23 shkurtit dhe i kërkuan Britanisë që t’i sigurojë Begum mbrojtje — duke përfshirë riatdhesimin — dhe të rishikojë vendimin për revokimin e shtetësisë së saj.
“Begum mbetet e zhveshur nga shtetësia e saj, e cenueshme dhe i mohohet ndihma dhe mbrojtja si një viktimë e mundshme e trafikimit,” thanë ekspertët.
“Mbrojtja që u detyrohet viktimave të trafikimit dhe atyre në rrezik trafikimi, veçanërisht fëmijëve, duhet të respektohen për të qenë kuptimplotë,” thanë ata.
Gjykata e Apelit e Anglisë hodhi poshtë të pesë argumentet e paraqitura nga Begum. Rreziku për sigurinë kombëtare kishte përparësi nëse ajo kishte qenë viktimë e mundshme e trafikimit, vendosi ajo. Begum ende mund ta çojë çështjen e saj në Gjykatën e Lartë të Mbretërisë së Bashkuar. Begum, familja e së cilës është me origjinë nga Bangladeshi, u largua nga shtëpia e saj në Londrën lindore për në Siri me dy shokë të shkollës në vitin 2015.
Ndërsa ishte atje, ajo u martua me një luftëtar të grupit xhihadist IS dhe pati tre fëmijë, asnjëri prej të cilëve nuk mbijetoi.
