SHKODER, 16 qershor 2013 – Një shpërthim i fuqishëm ka tronditur në orët e para të mëngjesit të sotëm banesën e kryetarit të komunës Postribë të Shkodrës.
Ngjarja ka ndodhur rreth orës 01:30 të mëngjesit, në fshatin Boks ku një sasi eksplozivi Ishte vendosur në automjetin e djalit të kryetarit të komunës Postribë, Faz Shabaj, 64 vjeç.
Sipas policisë, sasia e eksplozivit ishte vendosur në automjetin, tip “Transportier”, i markës Wolsvagen, me targe AA 681 AG, me ngjyrë të bardhë, i cili ishte në pronësi të shtetasit E. Shabaj por fatmirësisht nga shpërthimi nuk ka të plagosur në njerëz por vetëm dëme materiale.
Menjëherë në vendin e ngjarjes kanë mbërritur shërbimet policore sëbashku me grupin hetimor, ku nga veprimet e para hetimore rezultoi se, lënda plasëse është vendosur mbi sipërfaqen e tokës dhe si pasojë e këtij shperthimi është dëmtuar pjesërisht mjeti i sipërpërmendur, (konkretisht në pjesën e prapme e mbrapakolpit dhe të stopave), i cili ishte i parkuar në oborrin e banesës.
Ndërkohë policia po vijon hetimet për identifikimin e autorëve dhe zbardhjen e plotë të ngjarjes.
Faz Shabaj udhëheq këtë komunë të Qarkut Shkodër që prej vitit 1992 dhe aktualisht shërben në mandatin e tij të gjashtë, si përfaqësues i Partisë Demokratike.
