Kreu i Teslas dhe SpaceX, Elon Musk ka vënë në dyshim saktësinë e testit të koronavirusit, pasi vetë rezultoi një herë pozitiv dhe pastaj negativ brenda të njëjtës ditë.
Në një postim në Twitter, Musk u shpreh se e kishte bërë testin pasi prej disa ditësh kishte shfaqur simptoma ftohjeje.
“Dy teste dolën negative, dy tjera rezultuan pozitive. E njëjta pajisje, i njëjti test, e njëjta infermiere. Ka diçka të çuditshme këtu. Nëse gjëra të tilla më ndodhin mua, i ndodhin edhe të tjerëve”, shkruan Musk.
Miliarderi sqaroi se kishte bërë testin e shpejtë të antigjenit nga BD, duke iu referuar me shumë gjasë testeve të “Becton Dickinson and Co”, të cilat e nxjerrin rezultatin për 15 minuta.
Business Insider kontaktoi me kompaninë për të marrë një koment prej saj, por nuk pati asnjë të tillë. Tani Musk thotë se po pret rezultatet e testit PCR- standardi i artë për Covid 19, të cilat i ka bërë në disa laboratorë të ndryshëm dhe në fund, duket se ka ndërmend t`i krahasojë.
