Policia ka dhënë detaje të reja nga krimi i rëndë në familje, ku ish-dhëndri Dan Hutra shkoi në banesën e familjes së ish-bashkëjetueses dhe ekzekutoi me armë motrën dhe kunatën e saj.
Të plagosura kanë mbetur edhe bashkëjetuesja e autorit, 35-vjeçarja, Elena Hysa dhe nëna e saj, Kujtime Hysa, 60-vjeçe.
Ndërsa viktimat e krimit janë 30-vjeçarja Mevlute Hysa , (motra e ish-bashkëjetueses së tij) dhe 30 vjeçarja Hasime Dafku (e fejuara e vëllait të ish-bashkëjetueses).
40-vjeçari pasi ngjarjes është shpallur në kërkim nga policia dhe po punohet për kapjen e tij.
Njoftimi i policisë:
Më datë 01.03.2023, rreth orës 12:30, në rrugën “Rustem Haklaj”, në Kodër-Kamzë, shtetasi Dan Hutra, rreth 40 vjeç, ka plagosur me armë zjarri shtetaset Elena Hysa, 35 vjeçe, dhe Kujtime Hysa, 60 vjeçe (ish-bashkëjetuesja e tij dhe nëna e saj) dhe ka vrarë me armë zjarri shtetaset, Mevlute Hysa 30 vjeçe, (motra e ish-bashkëjetueses së tij) dhe Hasime Dafku 30 vjeçe, (e fejuara e vëllait të ish-bashkëjetueses).
Autori i dyshuar është shpallur në kërkim dhe vijon puna për kapjen e tij. Do të ndajmë me publikun foton e autorit të dyshuar dhe mirëpresim çdo informacion për vendndodhjen e tij.
Autori i dyshuar është arrestuar për dhunë në familje në datën 16.06.2022, dhe është liruar me datë 16.02.2023.
Më parë, ai ka qenë i dënuar për vrasjen e bashkëshortes së tij, ngjarje e ndodhur në vitin 2007, në Kukës.
