Hasan Loku nga Kosova është arrestuar nga Policia Tiranës për veprën penale të kanosjes.
Sipas njoftimit të policisë mësohet se i arrestuari i ka kërkuar një shumë prej 100 mijë eurosh një 26-vjeçareje, që të mos i publikonte në rrjetet sociale video dhe foto me përmbajtje intime. Uniformat blu bëjnë me dije se, materialet procedurale iu referuan Prokurorisë së Tiranës, për veprime të mëtejshme.
Njoftimi i policisë:
DVP Tiranë/Finalizohet operacioni i koduar “Privatësia”. Kanosi një shtetase, për t’i dhënë 100 000 euro, që të mos i publikonte në rrjete sociale, foto/video me përmbajtje intime, arrestohet shtetasi kosovar. Menjëherë pas indicjes se një shtetas kanoste nëpërmjet thirrjeve/mesazheve në një platformë një 26-vjeçare, që t’i jepte 100 000 euro, për të mos i publikuar në rrjete sociale, foto/video me përmbajtje intime, specialistët e Seksionit për Hetimin e Krimeve ndaj Pronës organizuan punën dhe në kuadër të operacionit “Privatësia”, kapën dhe u vunë në pranga autorin e dyshuar të rastit, shtetasin kosovar: -H. L., 37 vjeç, banues në Kosovë. Materialet procedurale iu referuan Prokurorisë së Tiranës, për veprime të mëtejshme, për veprën penale “Shtrëngimi me anë të kanosjes ose dhunës për dhënien e pasurisë”., shkruhet në njoftimin e policisë./
