Eugert Merizaj, i dënuar me 32 vite burg për vrasjen e tregtarit të drogës Hemawand Ali Hussein, do të transferohet nga Britania e Madhe në Shqipëri në kuadër të marrëveshjes për riatdhesimin e të burgosurve.
Ai ka postuar shpesh video në TikTok nga qelia, duke kërkuar kthimin në atdhe. Ky transferim është pjesë e një skeme që synon uljen e kostove për mbajtjen e të burgosurve në Britani dhe lehtësimin e mbingarkesës në burgjet britanike.
Pavarësisht transferimit të tij të afërt, Eugert Merizaj mbetet ende në HMP Manchester, i cili njihet edhe si Strangeways.
Edhe pse përdorimi i një telefoni celular pas hekurave është i paligjshëm, banditi ka transmetuar drejtpërdrejt në TikTok që nga viti 2023 dhe rojet duket se nuk janë në gjendje ta ndalojnë atë.
Në videon e tij të fundit, të xhiruar të enjten në mbrëmje, Merizaj u pa duke u ankuar se kaloi ‘katër ditë i mbyllur pa i hapur dyert’.
Në një bisedë të mëparshme në TikTok ku diskutohej mundësia e kthimit në Shqipëri, Merizaj renditi ankesat e tij me sistemin britanik të burgjeve.
“Ndoshta nuk do të kem telefon në burgun shqiptar, por e di që mund të marr një. Nuk e kam parë familjen time për shtatë vjet. Flas me ta çdo ditë, por nuk i kam takuar fizikisht”, tha ai.
