Europa është përfshirë nga vala e parë e të nxehtit për këtë verë, me temperatura që arrijnë deri në 42°C, ndërsa në kontinentin më të nxehtë në planet po bëhet gjithnjë e më e dukshme dhe problematike kriza klimatike.

Spanja paralajmëroi temperatura ekstreme në jug të vendit; agjencia shtetërore të motit Aemet bëri thirrje për më shumë kujdes, veçanërisht për të moshuarit, gratë shtatzëna dhe personat me probleme shëndetësore. Ministria e Shëndetësisë në Madrid këshilloi qytetarët të shmangin diellin dhe të qëndrojnë të hidratuar.

Edhe Portugalia do të jetë në gjendje gatishmërie, rreth dy të tretat e vendit pritet të preken, me temperaturat në Lisbonë që mund të shkojnë deri në 42°C dhe rrezik të lartë për zjarre në pyje.

Në Francë, autoritetet në Marsejë kanë vendosur që pishinat publike të jenë falas, për të ndihmuar qytetarët të përballojnë të nxehtin mesdhetar.

Në Itali, Sicilia dhe Liguria kanë ndaluar punën në ambiente të hapura gjatë orëve më të nxehta, ndërsa sindikatat po kërkojnë zbatimin e masës edhe në rajone të tjera.

Në Mbretërinë e Bashkuar autoritetet kanë lëshuar paralajmërime për nxehtësi ekstreme dhe kanë bërë hyrjen në pishinat publike falas, ndërsa në Wimbledon është aktivizuar rregulli i pushimit për shkak të vapës.

Në Gjermani është rritur niveli i alarmit për zjarre në pyje dhe po aktivizohet një plan kombëtar për mbrojtjen nga humbjet e jetës të lidhura me të nxehtin.

Në Zvicër janë shpallur alarme portokalli për temperaturat e larta në disa kantone dhe po merren masa në zonat alpine për të shmangur mbinxehjen.

Në Belgjikë, pas rekordit të temperaturave, autoritetet kanë paralajmëruar për rrezik zjarresh dhe ndërprerje të mundshme energjie për shkak të mbingarkesës.

Në Irlanë janë dhënë paralajmërime për kursim të ujit dhe masa për mbrojtje nga vapa pas rritjes së papritur të temperaturave në qershor.

Situata në Gadishullin e Ballkanit

Në Shqipëri, në disa qarqe janë shuar zjarre nëpër pyje dhe qytetarët janë këshilluar të shmangin ekspozimin në diell dhe të qëndrojnë të hidratuar.

Në Mal të Zi autoritetet kanë paralajmëruar për rrezik zjarresh në zonat malore dhe kanë shtuar patrullimet pyjore.

Në Maqedoninë e Veriut janë aktivizuar protokollet e emergjencës për shëndetin publik dhe është rritur furnizimi me ujë të pijshëm në disa zona.

Në Kosovë Instituti Hidrometeorologjik ka paralajmëruar për temperatura mbi 38°C dhe qytetarëve u është kërkuar të kufizojnë daljet gjatë ditës.

Në Serbi është shpallur alarm portokalli për nxehtësi dhe disa spitale kanë ngritur njësi për trajtimin e pacientëve me goditje nga vapa.

Në Bullgari janë pezulluar aktivitetet bujqësore gjatë mesditës në disa rajone, për të mbrojtur punëtorët nga temperaturat ekstreme.

Në Rumani autoritetet kanë shpërndarë ujë falas në stacione urbane dhe kanë hapur qendra freskimi për qytetarët.

Në Bosnje dhe Hercegovinë është kërkuar ndalimi i përkohshëm i punëve fizike në natyrë dhe janë pezulluar disa linja hekurudhore për shkak të deformimeve nga nxehtësia.

Në Greqi, ku temperaturat kanë kaluar 39°C, një zjarr i madh shpërtheu në jug të Athinës të enjten, duke detyruar evakuime dhe mbylljen e rrugëve turistike në bregdet.

Vala e të nxehtit vjen pas një sërë rekordesh klimatike, marsi i këtij viti ishte më i nxehti ndonjëherë në Europë, sipas monitorit të klimës Copernicus të BE-së.

Viti 2024 ishte më i nxehti i regjistruar, me katastrofa që kushtuan mbi 300 miliardë dollarë. Një studim i revistës The Lancet paralajmëron se humbjet e jetës nga i nxehti mund të trefishohen deri në fund të shekullit, veçanërisht në vendet e Europës Jugore si Italia, Greqia dhe Spanja. Aktualisht, vdekjet nga i nxehti në Europë arrijnë në rreth 44,000 në vit. /MONITOR