Kryetari i Partisë Demokratike, Sali Berisha, mblodhi në selinë blu këtë të enjte drejtuesit politikë të qarqeve. Ai foli para tyre në lidhje me propozimin më të ri të socialistëve, për faljen e gjobave për ndërtimet pa leje në zonat rurale. Berisha theksoi se qeveria është në panik dhe veprimi i ndërmarrë është okazional dhe mashtrues.
“Po ata që i kanë paguar? Ti kthejë paratë. Ti zbatojë siç janë për të zbatuar vendimet. Këta janë si parashtetërore, si parapolitikë. Këta nuk kanë veprim që nuk ndërmarrin okazional, hajde të mashtrojmë. Po heqim gjobat ne. Ktheju gjobat atyre që ke marrë nga viti 2014 me një ligj antikushtetues. Ky është detyrimi”, tha Berisha.
Sipas kryedemokratit, PS-ja është në panik dhe çdo ditë i bie besimi në popull. Drejtuesit politikë i përgëzoi për punën, por theksoi se qeveria Rama po përpiqet ta sabotojë votën e emigrantëve.
“Ndërkohë dua të ju njoftoj se përfaqësuesit tanë, në të gjitha proceset dhe takimet po bëjnë gjithçka për të garantuar një proces, jo përjashtues siç e do narkoqeveria, por një proces ku shqiptarët kudo që janë, me çdo dokument identiteti si shqiptar, të mund të shprehë vullnetin e tij. Ecuria në rrafshin zyrtar dhe burokratik, nuk është ajo që duhet të ishte, duhej të ishte më e shpejtë, por natyrisht Edi Rama përpiqet, një akt që nuk e ka dashur kurrë, bën gjithçka për ta sabotuar. Ne qëndrojmë të hapur dhe të vendosur për çdo vendim që mundëson votën masive, pa diskrimimin të qytetarëve tanë shqiptarë, kudo që janë. Këta, siç mund ta shihni janë në një kaos të vërtetë”, tha Berisha.
Berisha u ndal edhe te seanca parlamentare duke akuzuar mazhorancën se e prishi këtë të enjte.
“Urdhëro prishin seancën në një kohë kur e gjithë Shqipëria u trondit shumë me të drejtë, nga një vrasje në shkollë, në vendin më të sigurtë pas shtëpisë, për fëmijët. Imagjinoni se çfarë denatyrimi kanë këta njerëz, që në vend se me kokulur, apo shiko çfarë hipokritësh janë”, tha Berisha.
