FBI gjeti prova që sugjeronin se Covid-19 ishte shkaktuar nga një rrjedhje laboratorike, por nuk u lejua të informonte presidentin. Jason Bannan, doktor i mikrobiologjisë dhe ish-shkencëtar i lartë në FBI, i ka kushtuar më shumë se një vit të jetës së tij zbulimit të origjinës së Covid.
Por, pavarësisht se ishte e vetmja agjenci amerikane e inteligjencës kombëtare që arriti në përfundimin se një rrjedhje laboratorike ishte e mundshme, FBI dhe zoti Bannan thuhet se u refuzuan nga një konferencë e Këshillit Kombëtar të Inteligjencës me pjesëmarrjen e Joe Biden.
Biden kishte urdhëruar një hetim urgjent në maj 2021 nga agjencitë e inteligjencës amerikane dhe laboratorët kombëtarë për të identifikuar nëse virusi ishte transferuar nga një kafshë te një njeri apo kishte rrjedhur nga një laborator kinez.
Një nga teoritë më të njohura në atë kohë ishte se ai ishte transferuar nga një lakuriq nate në një “treg” në Wuhan, ku virusi u shfaq për herë të parë në 2019. Këshilli Kombëtar i Inteligjencës (NIC), një organ i oficerëve të lartë të inteligjencës që rishikoi provat, kishte arritur në përfundimin me “besim të ulët” se Covid-19 ishte transmetuar nga një kafshë te pacienti “zero”.
Kjo iu prezantua më pas nga Avril Haines, drejtoresha e inteligjencës kombëtare (DNI) dhe dy nga analistët e saj të lartë, Presidentit Biden dhe ndihmësve të tij kryesorë në gusht 2021.
Por FBI jo vetëm kishte arritur në përfundimin se një rrjedhje laboratorike ishte e mundshme, por se kishte “besim të moderuar” në vlerësimin e saj, më shumë se çdo agjenci tjetër, dhe kishte pritur që ta dërgonte këtë raport në Shtëpinë e Bardhë, por asnjë zyrtar nga agjencia nuk u ftua ta bënte.
Në intervistën e tij të parë, zoti Bannan i tha Wall Street Journal se: “duke qenë e vetmja agjenci që vlerësoi se një origjinë laboratorike kishte më shumë gjasa dhe agjencia që shprehu nivelin më të lartë të besimit në analizën e saj të burimit të pandemisë, ne prisnim që FBI-së do t’i kërkohet të marrë pjesë në mbledhje. Më duket e habitshme që Shtëpia e Bardhë nuk reagoi”.
Një zëdhënëse e zyrës së DNI tha për gazetën se pikëpamjet e ndryshme midis komunitetit të inteligjencës ishin përfaqësuar në mënyrë të drejtë dhe nuk ishte praktikë standarde të ftoheshin përfaqësues nga agjencitë individuale në takimin me presidentin.
Zyra e DNI dhe puna e NIC mbi origjinën e Covid-19 “përputhej me të gjitha standardet analitike të komunitetit të inteligjencës, përfshirë objektivitetin”, – tha zëdhënësja.
Zoti Bannan, i cili iu bashkua FBI-së si pjesë e përpjekjeve të agjencisë për të forcuar ekspertizën e saj në armët mikrobiologjike, toksinat dhe luftën biologjike pas 11 shtatorit, ka dalë në pension, por po kërkon që provat që mbështesin një teori të rrjedhjes së laboratorit të rivlerësohen.
Bashkëpunimi i vetëm i Kinës deri më tani ka qenë një raport i përbashkët me Organizatën Botërore të Shëndetësisë (OBSH) në vitin 2021, i cili thoshte se virusi ka shumë të ngjarë të lëvizte nga lakuriqët te njerëzit përmes një kafshe tjetër.
Sidoqoftë, zyrtarë të tjerë amerikanë gjithashtu dyshuan se Covid mund të kishte rrjedhur nga Instituti i Virologjisë në Wuhan, ku punonin shkencëtarët që kishin inxhineruar gjenetikisht koronaviruse, sipas dokumenteve të deklasifikuara të qeverisë amerikane.
Tre shkencëtarë në Qendrën Kombëtare për Inteligjencën Mjekësore, pjesë e Agjencisë së Inteligjencës Mbrojtëse të Pentagonit (DIA), kryen një studim shkencor që arriti në përfundimin se Covid-19 ishte manipuluar në një laborator në një përpjekje kërkimore të rrezikshme.
John Hardham, Robert Cutlip dhe Jean-Paul Chretien kryen një analizë gjenomike që arriti në përfundimin se një segment i “proteinës spike” që i mundëson virusit të hyjë në qelizat njerëzore u ndërtua duke përdorur teknika të zhvilluara në laboratorin Wuhan që u përshkruan në një punim shkencor kinez në vitin 2008.
