Fermerët polakë vijojnë bllokadën e rrugëve, kërkojnë heqjen e planeve të BE për klimën dhe importeve ukrainase

Fermerët polakë bllokuan rrugët me traktorët e tyre të mërkurën në përshkallëzimin e protestave kundër rregulloreve mjedisore të BE-së dhe importeve të lira të ushqimit nga Ukraina fqinje, të cilat BE pranoi përkohësisht t’i zgjaste.

“Marrëveshja e Gjelbër është e barabartë me vdekjen e bujqësisë polake”, shkruhej në pankartat e fermerëve duke iu referuar planit të bllokut për të trajtuar ndryshimet klimatike.

Ata shprehen se fermerët e Ukrainës po e vërshojnë Evropën me importe të lira që i lënë ata të paaftë për të konkurruar.

Me qindra protesta të planifikuara, pamjet nga lindja e Varshavës, shfaqin fermerët duke bllokuar rrugët për në kryeqytet.

“Ne kërkojmë tërheqjen e “Marrëveshjes së Gjelbër” në tërësi, ne kërkojmë tërheqjen e “Fit for 55″ (plani i BE-së për klimën), kufijtë për të gjitha emetimet, të gjitha ndalimet dhe urdhrat,” tha organizatori i protestës Lukasz Komorowski. , duke folur me fermerët e tjerë në bllokadën e Varshavës.

Të mërkurën, BE arriti një marrëveshje të përkohshme për të zgjatur aksesin pa tarifa të prodhuesve të ushqimit ukrainas në tregjet e saj deri në qershor 2025 – megjithëse me kufizime të reja në importet e grurit.

Udhëheqësit polakë të protestës thanë se nuk ishin të kënaqur me marrëveshjen e fundit pasi përfshinte vitet e fundit si referencë për kufijtë e importit. Ata duan kuota të bazuara në shifra shumë përpara fillimit të luftës në Ukrainë , kur importet ishin shumë më të ulëta.

“Ne kërkojmë kuota dhe që ato të llogariten për periudhën nga viti 2000, dhe jo siç dëshiron Ukraina 2022-2023, sepse ishte atëherë kur nivelet e importit ishin më të lartat. Kjo nuk na kënaq plotësisht, sepse nuk është një gjë e mirë,” i tha Reuters Slawomir Izdebski, udhëheqës i sindikatës së fermerëve OPZZ.

Policia polake tha se dinte për më shumë se 580 protesta të planifikuara për të mërkurën, me një pjesëmarrje prej 70,000 personash. Të premten e kaluar, Komisioni Evropian ofroi gjithashtu koncesione për fermerët pasi propozoi një lehtësim të rregullave për lënien e tokës djerrë ose rotacionin e të korrave.