Një magazinë dykatëshe në Fier është përfshirë nga zjarri mbrëmjen e sotme. Ngjarja ka ndodhur në zonën e njohur si SMT-ja. Ende mbeten të paqarta rrethanat, ndërsa policia dhe dy zjarrfikëse kanë mbërritur në vendngjarje, dhe pas rreth 30 minutash kanë mundur të vënë në kontroll flakët, duke mos lejuar të përhapen në objektet e tjera. Fatmirësisht nga flakët nuk ka të lënduar, ndërsa është konstatuar se në magazinë nuk ka pasur materiale me vlerë. Megjithatë është djegur tërësisht çatia e magazinës dykatëshe. Nga ana e bluve vijojnë hetimet për zbardhjen e shkaqeve të zjarrit.