“Kishte tre vjet e lidhur me atë atë person. I kërkuam disa herë që të ndahej, na tha se do të vriste veten”. Jonida Çanaku, 29-vjeçarja që u gjet e vrarë në Golem, u përcoll në banesën e fundit por familjarët nuk u lejuan për asnjë moment të hapnin arkivolin.
Babai i saj Stefan Çanaku tregon për se as në morg, as në shtëpi dhe as në varreza nuk është lejuar ta shikojë të bijën për herë të fundit. Në një intervistë për gazetën “Panorama” ai tregon se dyshimet e tij shkojnë deri aty sa nuk e di se kë ka varrosur.
Babai rrëfen frikën që kishte se ajo mund të vriste veten, pasi disa herë u kishte thënë se do të bënte vetëvrasje, nëse ndahej nga Shani…
Kur ka qenë hera e fundit që e keni parë vajzën tuaj?
Për herë të fundit e pashë ditën kur doli nga shtëpia e gjallë, për të m’u kthyer e vdekur. As për së vdekuri nuk arrita ta shoh. Doli nga shtëpia të shtunën në darkë, rreth orës 21:00, dhe më pas as nuk
kam folur dhe as nuk e kam parë më.
Ju tha se ku po shkonte të shtunën, kur doli?
Na tha që do të takonte Sokratin. Siç na thoshte gjithmonë. Por as se ku do të shkonte dhe as se sa do të rrinte e kur do të kthehej.
Ai vetë erdhi ta merrte?
Jo, ai nuk para vinte vetë këtu. Shumë rrallë. Dërgonte makina të ndryshme, njerëz të ndryshëm që ne nuk i njohim.
Pra, ju keni qenë në dijeni të lidhjes që ajo kishte me 65-vjeçarin?
Po, kemi qenë të gjithë në dijeni. Edhe pse pa dëshirën tonë, nuk kishim si ta ndanim nga ai. Atë kishte zgjedhur vetë.
Sa kohë kishte vajza që ishte lidhur me këtë person?
Kishte diçka më shumë se 3 vjet.
Ai ishte i martuar?
Po, i martuar dhe me fëmijë. Por thoshte që nuk jetonte më me të shoqen. Jetonin ndarazi. Nuk ishin divorcuar zyrtarisht, por thoshte se do të niste procedurat e divorcit.
