Prej mëngjesit të kësaj të marte (24 shkurt), një tjetër rrugë e rëndësishme është evidentuar e dëmtuar seriozisht, pas problematikave në aksin kombëtar Pogradec-Librazhd, që ka izoluar prej ditësh juglindjen e vendit totalisht dhe ka thelluar skandalet e ministres së pezulluar të linjës, Belinda Balluku, për cilësinë e punimeve dhe tenderimet.
Bëhet fjalë për segmentin turistik Boboshticë-Dardhë, në qarkun e Korçës, ku është konstatuar një çarje anësore e trupit të rrugës, që kufizon lëvizjen e drejtuesve të mjeteve në një korsi.
Autoriteti rrugor ka shkuar në terren për të vlerësuar gjendjen dhe po shqyrtojnë masat për stabilizimin e segmentit, ndërsa kanë vënë në rrugë sinjalistikë kufizuese për drejtuesit e mjeteve.
Kjo situatë vjen pas disa problematikave të tjera në rrugët e juglindjes, ku rrëshqitjet e dherave dhe çarjet e asfaltit janë bërë të zakonshme duke ngjallur shqetësim për cilësinë e punimeve dhe për sigurinë e lëvizjes.
Duhet thënë gjithashtu se ky segment është një nga nyjet më të rëndësishme që lidh Korçën me fshatin turistik të Dardhës.
