Izraelit iu bë thirrje për përmbajtje pas sulmit të paprecedentë të Iranit ndaj vendit, nga frika se përleshja mund të ndezë më tej tensionet në Lindjen e Mesme dhe t’i sjellë dy armiqtë e betuar në prag të luftës.
Kancelari gjerman, Olaf Scholz i bëri thirrje Izraelit të ndihmojë në zbutjen e situatës, duke e quajtur parandalimin kryesisht të suksesshëm të vendit me rreth 300 dronë dhe raketa “një sukses që ndoshta nuk duhet hedhur tutje”.
“Ne do të bëjmë gjithçka në fuqinë tonë për të parandaluar një shpërthim, një përshkallëzim”, theksoi presidenti francez Emmanuel Macron për transmetuesin BFMTV.
Sipas një zyrtari të lartë të qeverisë amerikane, të dielën, presidenti i SHBA Joe Biden i kishte kërkuar Netanyahut të “mendonte me kujdes dhe strategjik për rreziqet e përshkallëzimit”.
Brenda qeverisë izraelite, ka thirrje për veprim të shpejtë dhe të ashpër, veçanërisht nga politikanët e krahut të djathtë ekstrem. Megjithatë, palët e vijës së ashpër nuk janë të përfaqësuar në kabinetin e luftës.
“Gjëja më e mirë për të bërë në rastin e Izraelit është të pranojmë se ky ka qenë një dështim për Iranin”, tha sekretari i Jashtëm britanik David Cameron për Times Radio.
Ndërsa Izraeli kishte të drejtën t’i përgjigjej një sulmi të tillë, ai tha se Britania gjithashtu dëshironte të shmangte përshkallëzimin dhe po i kërkonte vendit të “mendonte me kokë ashtu edhe me zemër”.
Udhëheqësit perëndimorë drejtuan gjithashtu paralajmërime në Teheran.
Kabineti i luftës i Izraelit u takua për herë të dytë në 24 orë të hënën dhe shqyrtoi disa përgjigje të mundshme ndaj sulmit, raportuan mediat, por fillimisht ishte e paqartë nëse ishte marrë një vendim.
Disa opsione janë të vogla në natyrë, ndërsa të tjerat janë më sfiduese, raportoi stacioni televiziv izraelit Channel 12, duke thënë se ‘’Izraeli kërkon një përgjigje që është e dhimbshme për Iranin pa ndezur një luftë rajonale’’.
Kabineti, i udhëhequr nga kryeministri Benjamin Netanyahu, u takua për gati tre orë, duke shqyrtuar përgjigjet e mundshme ndaj sulmeve ajrore, të cilat erdhën pas një sulmi ndaj ambasadës iraniane në Damask që besohet të jetë kryer nga Izraeli.
