3 dhjetor 2014 – I menjëhershëm ishte reagimi i FSHF në lidhje me vendimin e Komisionit të Apelit të Uefa-s. Irritim për një vendim politik, konfirmim i ankimimit të cështjes në Arbitrazhin Sportiv, por cka është dhe më e rëndësishmja dhe një spirale shprese më shumë për të gjetur drejtësi në Lozanë duke u bazuar në faktet që kanë dalë në dritë në seancën e fundit të Apelit, Është kjo sinteza e komunikatës së insittucionit të Futbollit Shqiptar. Natyrishëm që e pakënaqur në lidhje me këtë verdikt që la në fuqi "en bloc" vendimet e Komisionit të Disiplinës, pavarësisht argumentave juridike dhe fakteve të argumentuara me foto dhe video, FSHF e cilëson vendimin e Apelit politik, ashtu si dhe atë të disiplinës, duke konfirmuar zyrtarisht si hap të rradhës ankimimin e cështjes në Gjykatën e Arbitrazhit Sportiv në Lozanë.
FSHF e indinjuar për mosmarrjen parasysh në apel të fajkteve të vërtetuara te dhunimit të lojtarëve shqiptarë, pushtimit të fushës nga tifozë dhe persona të inkriminuar, e thirrjeve rraciste, gjithsesi lë të kuptohet se gjatë seancës së pyetjeve të Komisionit të Apelit kanë dalë në pah shumë fakte të reja, por dhe deklarata kontradiktore të zyrtarëve të ndeshjes, që sipas FSHF forcojnë bindjen se në shkallët e mëtejshme Shqipëria do të gjejë drejtësinë. Më tej FSHF konfirmon se do të kërkojë tre pikët e fitores në Gjykatën e Arbitrazhit Sportiv në Lozanë, e bindur për të vijuar betejën ligjore dhe e qartë në qëndrimin e saj. Komunikata për shtyp nga FSHF: Federata Shqiptare e Futbollit, u njoh të martën në mbrëmje me vendimin e Komisionit të Apelit, tek i cili shpresonte që të gjente më tepër drejtësi, në lidhje me vendimin e Komisionit të Etikës dhe Disiplinës, për ndeshjen e Serbi – Shqipëri, zhvilluar në Beograd më datë 14 tetor 2014 dhe të ndërprerë në minutën e 41 të takimit. Ky vendim i këtij Komisioni, la në fuqi të gjitha vendimet e Komisionit të Etikës dhe Disiplinës së UEFA-s, në lidhje me këtë takim të papërfunduar.Pavarësisht argumenteve juridike dhe fakteve të dokumentuara me foto dhe video, si edhe mbrojtjes profesionale të avokat Antonio Rigozzi dhe studiove ligjore, të prenotuara nga FSHF, përsëri asgjë nuk ndryshoi. Pavarësisht nga qëndrimi i njëjtë politik i Komisionit të Apelit, FSHF është e indinjuar për mosmarrjen parasysh e fakteve të vërtetuara të dhunimit të lojtarëve shqiptarë.
Të pushtimit të fushës, nga tifozë dhe persona të inkriminuar, të thirrjeve raciste “vritini shqiptarët”, të hedhjes në fushë të sendeve të forta dhe fishekzjarreve dhe të shumë elementëve të pasigurisë. Megjithatë, gjatë seancës së pyetjeve, kanë dalë shumë fakte të reja dhe deklarata kontradiktore, të zyrtarëve të ndeshjes, që deklaruan për këtë takim, të cilat akoma më shumë na bindin se në shkallët e mëtejshme, Shqipëria do të gjejë drejtësinë. Federata Shqiptare e Futbollit, e pakënaqur me këtë vendim njofton opinionin, dhe median, se do të vazhdojë ta kërkojë drejtësinë, pranë Gjykatës të Arbitrazhit Sportiv (KAS) në Lozanë, edhe më shumë e binduar se i takojnë tre pikët e fitores, së kësaj ndeshjeje. FSHF do të vazhdojë betejën e saj ligjore, e qartë në qëndrimin e saj, se vetëm kështu do të fitojë vetëm futbolli. Një lojë e pastër, pa dhunë dhe pa racizëm
