LUKSEMBURG, 23 prill 2013- Në Luksemburg është mbledhur sot në mesditë Këshilli i Stabilizim-Associimit, që po diskuton për Shqipërinë.
Komisioneri për zgjerimin, Stefan Fyle theksoi se vendi duhet te vijojë me axhendën e reformave të kërkuara, ndërkohë që ka shtuar se BE pret progres nga Shqipëria lidhur me procesin zgjedhor.
“BE pret progres përsa i përket procesit zgjedhor. Do dërgojmë ekipe vëzhguesish për zgjedhjet e 23 qershorit”, tha Fyle.
E pranishme në këtë takim, ministrja e Integrimit, Majlinda Bregu, theksoi se qeveria është e angazhuar për plotësimin e detyrimeve. “Do t’i përmbushim të gjitha detyrimet, përfshirë luftën kundër korrupsionit”,- ka thënë ajo. Bregu kujtoi se këtë detyrim nuk e kanë vetëm vendet aspirante për kanditate, por edhe ato qe janë tashmë pjesë e BE.
Ajo theksoi se dihet tashmë pse nuk u votuan tre ligjet e integrimit, duke kujtuar bllokimin e bërë nga opozita.
"Rekomandimi u kushtëzua me votimin e tre ligjeve, pjesa më e madhe e kushteve për statusin janë përmbushur, mëkat që bashkëpunimi qeveri-opozitë u ndërpre", u shpreh ajo.
Në këtë takim pritet që vendet anëtare të shprehin mes te tjerash edhe qëndrimin e përbashkët për ecurinë e Shqipërisë drejt Bashkimit Europian.
Pritet qe vendet anetare te këmbëngulin në plotësimin e axhendës së reformave të Shqipërisë në kuadër të marrjes së statusit të vendit kandidat në BE.
