12 nëntor 2015 – Aktori i humorit Gent Hazizi vjen në datat 13 e 14 nëntor në orën 18:00, në teatrin e Durrësit “Aleksandër Moisiu”, me shfaqjen “Plako të majt e jotja”. Një Stand Up komedi, që sjell para publikut shumë humor, por të bën gjithashtu edhe të mendosh.
Aktori në shfaqjen e tij, trajton tema të realitetit duke i sjellë me humor në disa fusha sociale dhe të realitetit të përditshëm që jetojmë ne sot. Familja, shoqëria, marrëdhëniet që ndërtohen midis njerëzve, janë temë e subjektit të komedisë. Kjo shfaqje, mbart mesazhin që “Çdo njeri duhet të besojë te vetvetja, të besojë tek ëndrrat e tij, pavarësisht nga pengesat, pavarësisht nga çfarë thonë njerëzit. Njeriu duhet t’i ndjekë ëndrrat e t’i bëjë realitet”, thotë Hazizi.
Për Gent Hazizin, Stand Up komedia është një zhaner i ri, tek i cili gjen vetveten. Aktori premton për publikun shumë të qeshura, batuta dhe humor.
Më herët, “Plako të majt e jotja” ka udhëtuar në disa qytete si Korçë Pogradec, Vlorë etj, ku aktori është mirëpritur nga publiku. Po kështu, pas Durrësit shfaqja do të kulmojë në Tiranë.
/K.H. portali DurresLajm/
