Gjermania po lë pas politikën e saj historike të pacifizmit dhe po përgatitet për një epokë të re ushtarake. Pas vendimit për të përjashtuar shpenzimet e mbrojtjes nga kufizimet e borxhit, ushtria gjermane (Bundeswehr) pritet të marrë financime të paprecedenta.
Gjenerali Breuer: “Kërcënohemi nga Rusia, duhet të veprojmë shpejt”
Gjenerali Carsten Breuer paralajmëron se Rusia nuk do të ndalet në Ukrainë dhe NATO duhet të përgatitet për një konflikt të mundshëm brenda katër vitesh.
“Putini na ka dhënë një afat, dhe sa më shpejt të jemi gati, aq më mirë”, deklaroi ai për BBC.
Sipas tij, Gjermanisë i duhen 100 mijë trupa shtesë për të mbrojtur veten dhe krahun lindor të NATO-s. Ai nënvizon se shërbimi ushtarak i detyrueshëm është i domosdoshëm për të arritur këtë objektiv.
Ndryshimi i qasjes gjermane ndaj Rusisë
Pushtimi rus i Ukrainës ka tronditur qëndrimin tradicional gjerman ndaj forcave të armatosura. Ndryshe nga e kaluara, kur Berlini besonte se marrëdhëniet ekonomike mund ta demokratizonin Moskën, tani 79% e gjermanëve e shohin Putinin si kërcënim për paqen europiane.
Ish-kancelarja Angela Merkel kishte ndjekur një qasje të butë ndaj Kremlinit, ndërsa pasardhësi i saj, Olaf Scholz, miratoi 100 miliardë euro për ushtrinë menjëherë pas nisjes së luftës. Megjithatë, gjenerali Breuer thotë se kjo nuk është e mjaftueshme.
Gjermania përballet me sfida të mëdha ushtarake
Raporti i fundit parlamentar ka nxjerrë në pah mungesa të theksuara në ushtri, nga municionet te infrastruktura e kazermave. Aktualisht, Bundeswehr ka shumë pak personel dhe pajisje për t’u përballur me një kërcënim të madh.
Në Berlin, diskutimi për fuqizimin e ushtrisë sapo ka nisur. Por pyetja e madhe mbetet: A është Gjermania gati për luftë?
