Gjykata e Durrësit ka shpallur të pafajshëm 4 ish-zyrtarët e administratës lokale të akuzuar për shpërdorim detyre dhe falsifikim dokumentesh lidhur me pasojat e tërmetit të 26 nëntorit 2019, në objektet që u shkatërruan duke sjellë dhe pasoja në njerëz.

Gjykata ka lënë të lirë ish-kreun e ALUIZNI-t Flamur Gjuzin, ish-drejtorin e IMT-së Artur Çelën, Artur Terziun dhe Nevjana Isufin.

Dënim me kusht është dhënë për Albrend Qetka, Skerdi Bello dhe Aldo Dakovelli.

VENDIMI

Gjykata e Rrethit Gjyqësor Durrës vendosi:

  1. Deklarimin e pafajshëm të të pandehurës N.I, për kryerjen e veprës penale “Falsifikimi i dokumentave”, parashikuar nga neni 186/1 të Kodit Penal.
  2. Në aplikim të neneve 261 dhe 389 të K.Pr.Penale, duke qenë se e pandehura u deklarua i pafajshëm, konstatohet shuarja e masës së sigurimit “Detyrimi për t’u paraqitur në policinë gjyqësore” caktuar ndaj të pandehurës N.I me Vendimin nr. 348, datë 30.12.2019 të Gjykatës së Apelit Durrës.
  3. Deklarimin fajtor të të pandehurit A.D për kryerjen e veprës penale “Shpërdorimi i detyrës”, parashikuar nga neni 248  të Kodit Penal dhe dënimin e tij me 1 (një) vit e 6 (gjashtë) muaj burgim.
  4. Në zbatim të nenit 406/1 të Kodit të Procedurës Penale, të pandehurit A.D i ulet 1/3 (një e treta) e dënimit të dhënë, duke u dënuar përfundimisht me 1 (një) vit burgim.
  5. Në zbatim të nenit 59 të Kodit Penal urdhërohet pezullimi i dënimit me burgim, duke e vënë në provë të pandehurin A.D për një periudhë kohe prej 2 (dy) vitesh, me kusht që gjatë kësaj kohe i pandehuri të mos kryejë vepër tjetër penale. Gjatë kësaj kohe i pandehuri detyrohet të mbajë kontakte me Degën Territoriale të Shërbimit të Provës që mbulon vendbanimin e tij nga e nesërmja e shpalljes së këtij vendimi.
  6. Në aplikim të neneve 261 dhe 389 të K.Pr.Penale, duke qenë se dënimi me burgim u pezullua me kusht, konstatohet shuarja e masës së sigurimit “Detyrimi për t’u paraqitur në policinë gjyqësore” caktuar ndaj të pandehurit A.D me Vendimin nr.10-2020-666, datë 28.05.2020 të Gjykatës së Apelit Durrës.
  7. Në zbatim të nenit 35 të Kodit Penal, të pandehurit A.D i hiqet e drejta për të ushtruar funksione publike për një kohë prej 5 (pesë) vitesh.
  8. Deklarimin e pafajshëm të të pandehurit A.T, për kryerjen e veprës penale “Falsifikimi i dokumentave”, parashikuar nga neni 186/1 të Kodit Penal.
  9. Në aplikim të neneve 261 dhe 389 të K.Pr.Penale, duke qenë se i pandehuri u deklarua i pafajshëm, konstatohet shuarja e masës së sigurimit “Detyrimi për t’u paraqitur në policinë gjyqësore” caktuar ndaj të pandehurit A.T me Vendimin nr.393/19, datë 28.07.2020 të Gjykatës së Rrethit Gjyqësor Durrës.
  10. Deklarimin e pafajshëm të të pandehurit A.Ç, për kryerjen e veprës penale “Shpërdorimi i detyrës”, parashikuar nga neni 248 të Kodit Penal.
  11. Në aplikim të neneve 261 dhe 389 të K.Pr.Penale, duke qenë se i pandehuri u deklarua i pafajshëm, konstatohet shuarja e masës së sigurimit “Arresti në burg” në mungesë, caktuar ndaj të pandehurit A.Ç me Vendimin nr. 393/11, datë 19.02.2020 të Gjykatës së Rrethit Gjyqësor Durrës.
  12. Deklarimin e pafajshëm të të pandehurit F.Gj, për kryerjen e veprës penale “Shpërdorimi i detyrës”, parashikuar nga neni 248 të Kodit Penal.
  13. Në aplikim të neneve 261 dhe 389 të K.Pr.Penale, duke qenë se i pandehuri u deklarua i pafajshëm, konstatohet shuarja e masës së sigurimit “Detyrimi për t’u paraqitur në policinë gjyqësore” caktuar ndaj të pandehurit F.Gj me Vendimin nr.103, datë 13.04.2020 të Gjykatës së Apelit Durrës.
  14. Deklarimin fajtor të të pandehurit S.B për kryerjen e veprës penale “Shpërdorimi i detyrës”, parashikuar nga neni 248  të Kodit Penal dhe dënimin e tij me 1 (një) vit e 6 (gjashtë) muaj burgim.
  15. Në zbatim të nenit 406/1 të Kodit të Procedurës Penale, të pandehurit S.B i ulet 1/3 (një e treta) e dënimit të dhënë, duke u dënuar përfundimisht me 1 (një) vit burgim.
  16. Në zbatim të nenit 59 të Kodit Penal urdhërohet pezullimi i dënimit me burgim, duke e vënë në provë të pandehurin S.B për një periudhë kohe prej 2 (dy) vitesh, me kusht që gjatë kësaj kohe i pandehuri të mos kryejë vepër tjetër penale. Gjatë kësaj kohe i pandehuri detyrohet të mbajë kontakte me Degën Territoriale të Shërbimit të Provës që mbulon vendbanimin e tij nga e nesërmja e shpalljes së këtij vendimi.
  17. Në aplikim të neneve 261 dhe 389 të K.Pr.Penale, duke qenë se dënimi me burgim u pezullua me kusht, konstatohet shuarja e masës së sigurimit “Detyrimi për t’u paraqitur në policinë gjyqësore” caktuar ndaj të pandehurit S.B me Vendimin nr.393/23, datë 29.08.2020 të Gjykatës së Rrethit Gjyqësor Durrës.
  18. Në zbatim të nenit 35 të Kodit Penal, të pandehurit S.B i hiqet e drejta për të ushtruar funksione publike për një kohë prej 5 (pesë) vitesh.
  19. Deklarimin fajtor të të pandehurit A.Q për kryerjen e veprës penale “Shpërdorimi i detyrës”, parashikuar nga neni 248  të Kodit Penal dhe dënimin e tij me 1 (një) vit burgim.
  20. Në zbatim të nenit 406/1 të Kodit të Procedurës Penale, të pandehurit A.Q i ulet 1/3 (një e treta) e dënimit të dhënë, duke u dënuar përfundimisht me 8 (tetë) muaj burgim.
  21. Në zbatim të nenit 63 të Kodit Penal urdhërohet pezullimi i dënimit me burgim, duke e detyruar të pandehurin A.Q të kryejë 180 (njëqind e tetëdhjetë) orë punë në interes publik, për një periudhë kohe prej 6 (gjashtë) muajsh. Gjatë kësaj kohe i pandehuri detyrohet të mbajë kontakte me shërbimin e provës, për t’i caktuar llojin e punës që i pandehuri do të kryejë, vendin e kryerjes së punës dhe ditët e javës kur do të kryhet puna në interes publik.
  22. Në zbatim të nenit 35 të Kodit Penal, të pandehurit A.Q i hiqet e drejta për të ushtruar funksione publike për një kohë prej 5 (pesë) vitesh.
  23. Shpenzimet proceduriale të parapaguara nga shteti, si dhe shpenzimet gjyqësore i ngarkohen të i’u ngarkohen të pandehurve A.D, S.B dhe A.Q në mënyrë solidare.
  24. Urdhërohet Organi i Prokurorisë për ndjekjen dhe zbatimin e këtij vendimi sipas nenit 462 e vijues të K.Pr.Penale.
  25. Kundër këtij vendimi mund të bëhet ankim në Gjykatën e Apelit Durrës, brenda 15 (pesëmbëdhjetë) ditëve, duke filluar ky afat nga e nesërmja e njoftimit të këtij vendimi.