Gjykata e Kavajës dha sot masën e sigurisë "arrest me burg" për 5 të arrestuarit e vrasjes së pak ditëve më parë në këtë qytet. Gjykata la në burg shtetasit Ardian Dedej, Eraldo Hykën, Qazim Merkaj, Marjus Aliun dhe Agron Kollçakun.
Përplasja me armë u shënua me 5 korrik. Si pasojë e shkëmbimit të zjarrit mes dy grupeve rivale të rinjshgjeti vdekjen kalimtari Ramazan Hasanlliu, i cili sapo kishte blerë bukë në furrën e lagjes e po shkonte drejt shtëpisë dhe u plagosën 5 të tjerë.
Për ngjarjen vazhdon të jetë në kërkim vëllai i Marjus Aliut, Denis Aliu, 33 vjeç. Sherri ka nisur mbrëmjen e së mërkurës mes Eraldo Hykës dhe Denis Alisë, ndërsa kanë pasur edhe një përplasje në orët e paradites së të enjtes.
Ndërsa në mesditë, palët mësohet se janë takuar për sqarim pranë lokalit të rivalëve Dedej, ku përplasja përshkallëzoi në përdorimin e armëve të zjarrit.
Të paktën katër armë zjarri u përdorën në luftën mes të rinjve, ku plumbat krijuan terror dhe nuk kursyen as kalimtarët e rastësishëm. Veç Ramazan Hasanlliut, që mbeti viktimë u plagosën edhe qytetarët Sali Mekja dhe Arben Hajdini që ndodheshin në një lokal aty pranë.
Ndërkohë nga të rinjtë e përfshirë në konflikt mbetën të plagosur Marjus Aliu, Ardian Dedej dhe Eraldo Hyka, që të tre të arrestuar.
