Sipas të dhënave të publikuara nga Eurostat, gratë në Shqipëri kanë një jetëgjatësi mesatare më të lartë se burrat, duke jetuar rreth katër vite më shumë. Mesatarisht, gratë shqiptare arrijnë 82.5 vite jetë, ndërsa burrat rreth 78.6 vite.
Raporti tregon gjithashtu se jetëgjatësia ndryshon edhe sipas rajoneve të vendit. Zonat jugore dhe ato qendrore shënojnë nivelet më të larta. Në jug, jetëgjatësia mesatare arrin në 80.77 vite, ndërsa në qendër është pothuajse e njëjtë, rreth 80.74 vite. Ndërkohë, veriu i vendit paraqet treguesin më të ulët, me një mesatare prej rreth 79.2 vitesh.
Në tërësi, jetëgjatësia mesatare e popullsisë në Shqipëri llogaritet rreth 80.5 vite, duke mbetur afërsisht një vit më poshtë se mesatarja e Bashkimit Europian, e cila është rreth 81.5 vite.
Në nivel europian, jetëgjatësia pësoi rënie gjatë viteve 2020 dhe 2021 si pasojë e pandemisë së COVID-19. Në vitin 2020 ajo zbriti në 80.4 vite dhe në vitin 2021 në 80.1 vite. Megjithatë, vitet e fundit tregojnë një rikuperim, duke e çuar këtë tregues mbi nivelin e vitit 2019, kur mesatarja ishte 81.3 vite.
Sa i përket rajoneve me jetëgjatësinë më të lartë në Europë, disa zona kanë arritur ose kanë tejkaluar pragun e 85 viteve. Mes tyre janë rajoni i Madrid në Spanjë me 85.7 vite, rajonet italiane Trento dhe Bolzano në Itali, si dhe kryeqyteti suedez Stokholm në Suedi, ku jetëgjatësia mesatare arrin rreth 85 vite.
