Kryeministri grek, Kyriakos Mitsotakis, ka lëshuar një paralajmërim të radhës ndaj strukturave të reja shtetërore në Maqedoninë e Veriut, pas përdorimit të vazhdueshëm të termit “Maqedoni” në vend të “Maqedoni e Veriut” nga presidentja e zgjedhur, Gordana Siliakovska Davkova dhe kryeministri i zgjedhur, Hristijan Mickoski.
“Kur filloni të tërhiqni litarin, bëhuni gati nëse ai këputet”.
Ka qenë kjo retorika e Mitsotakis, teksa ka folur për gazetën greke “TA NEA”.
“Dhe nëse del nga kursi i rënë dakord, le ta dijë se do ta gjejë të mbyllur rrugën drejt Evropës”, rrugë e cila siç thotë ai “kalon nga Greqia dhe respektimi i së drejtës ndërkombëtare”, ka vijuar.
Lidhur me marrëdhëniet me Turqinë, kryeministri grek kujton se ka thënë dy vjet më parë se “provokimet ndalojnë dhe fillojnë diskutimet”. Dhe tani edhe presidenti turk, Recep Tayyip Erdogan, ka marrë këtë rrugë sipas tij.
Mitsotakis e bën të qartë gjithashtu se nuk diskutohet një zgjidhje paketë. “Greqia nuk i harron mosmarrëveshjet e saj me Turqinë. Megjithatë kjo nuk do të thotë se duhet të jetojmë me gishtin në këmbëz gjatë gjithë kohës”.
“Dhe për shkak se disa njerëz në Greqi dhe Turqi ushqehen me krizën greko-turke, pyesni kritikët tanë për rezultatet e politikës sonë, të cilët shohin reduktimin e flukseve të imigracionit. Ose banorët tanë ishullorë që kanë parë rritjen e ekonomive lokale nga vizat për vizitorët turq. Shihni edhe pozicionin e Greqisë në kontekstin ndërkombëtar. Konfrontim, apo një përpjekje për të bashkëjetuar me fqinjin tonë, kur pak më poshtë Lindja e Mesme është në zjarr dhe në zemër të Evropës është ndezur lufta?”, shtron pyetjen ai.
