Hamasi thotë se dëshiron të shohë një zgjatje të pauzës aktuale në luftimet në Gaza, një veprim që mund të rrisë numrin e pengjeve që lirohen.
Sipas marrëveshjes aktuale, dita e fundit e armëpushimit është e hëna.
Në një deklaratë, Hamasi thotë se “po kërkon të zgjasë armëpushimin pas përfundimit të katër ditëve përmes përpjekjeve serioze për të rritur numrin e pengjeve të liruar siç përcaktohet në marrëveshjen e armëpushimit humanitar”.
Një zyrtar i lartë palestinez i njohur me negociatat që po zhvillohen në Katar i ka thënë gjithashtu BBC-së se Hamasi ka informuar ndërmjetësuesit se është i gatshëm të zgjasë pauzën me dy deri në katër ditë dhe se një zgjatje mund të sjellë lirimin e 20 deri në 40 të burgosurve izraelitë.
Sipas kushteve të pauzës aktuale, e cila filloi të premten, gjithsej 50 pengje izraelite do të lirohen për katër ditë në këmbim të 150 të burgosurve palestinezë.
Ne ende nuk kemi dëgjuar nga qeveria izraelite për këtë deklaratë të fundit të Hamasit. Megjithatë, ajo ka thënë më parë se armëpushimi mund të zgjatet nëse lirohen të paktën 10 izraelitë në ditë, megjithëse ka këmbëngulur gjithashtu se pauza do të jetë vetëm e përkohshme dhe është zotuar të zhdukë Hamasin.
